​

អ្នកនាំពាក្យក្រសួងការបរទេសសហរដ្ឋអាមេរិក បាននិយាយថា រដ្ឋមន្ត្រីការបរទេស លោក Antony Blinken បាននិយាយទៅកាន់សមភាគីឥណ្ឌារបស់លោក កាលពីថ្ងៃព្រហស្បតិ៍ អំពីការឃាតកម្មលើអ្នកតស៊ូមតិផ្តាច់ខ្លួនសាសនាស៊ីកនៅក្នុងប្រទេសកាណាដា និងបានជំរុញឱ្យប្រទេសឥណ្ឌា សហការពេញលេញក្នុងការស៊ើបអង្កេតជាមួយប្រទេសកាណាដា លើឃាតកម្មនេះ ។ រដ្ឋមន្ត្រីការបរទេសឥណ្ឌា លោក Subrahmanyam Jaishankar បានបញ្ជាក់កាលពីថ្ងៃសុក្រថា លោកបានពិភាក្សាជាមួយលោក Blinken និងទីប្រឹក្សាសន្តិសុខជាតិសហរដ្ឋអាមេរិក លោក Jake Sullivan អំពីការចោទប្រកាន់របស់កាណាដា លើការជាប់ពាក់ព័ន្ធដែលអាចមានរបស់ទីក្រុង New Delhi ក្នុងការសម្លាប់មេដឹកនាំផ្តាច់ខ្លួន សាសនាស៊ីក កាលពីខែមិថុនា នៅប្រទេសកាណាដា។ លោក Jaishankar បាននិយាយនៅក្នុងព្រឹត្តិការណ៍មួយរៀបចំដោយវិទ្យាស្ថាន Hudson ក្នុងទីក្រុងវ៉ាស៊ីនតោនថា ពួកគេបានចែករំលែកទស្សនៈ និងការវាយតម្លៃរបស់សហរដ្ឋអាមេរិក លើស្ថានភាពទាំងមូល ហើយលោកបានពន្យល់ដល់ពួកគេ និងនិយាយសង្ខេបពីការព្រួយបារម្ភដែលលោកមាន។ ទំនាក់ទំនងរវាងប្រទេសឥណ្ឌា និងកាណាដា កាន់តែតានតឹងខ្លាំងឡើង បន្ទាប់ពីនាយករដ្ឋមន្ត្រីកាណាដា លោក Justin Trudeau បានប្រាប់សភាកាលពីដើមខែនេះថា កាណាដា សង្ស័យថាភ្នាក់ងាររដ្ឋាភិបាលឥណ្ឌា មានជាប់ពាក់ព័ន្ធក្នុងការសម្លាប់អ្នកផ្តាច់ខ្លួនសាសនាស៊ីកលោក Hardeep Singh Nijjar ។ ឧបទ្ទវហេតុនេះ បានធ្វើឱ្យសហរដ្ឋអាមេរិក ជួបការលំបាកផ្នែកការទូត ដោយសារប្រទេសកាណាដា ជាប្រទេសជិតខាង និងជាសម្ព័ន្ធមិត្តផ្លូវការ ហើយទីក្រុងវ៉ាស៊ីនតោន បានយកចិត្តទុកដាក់ខ្លាំងលើការអភិវឌ្ឍន៍ទំនាក់ទំនងជាមួយប្រទេសឥណ្ឌា ជាដៃគូសំខាន់ក្នុងកិច្ចខិតខំប្រឹងប្រែងរបស់ខ្លួនដើម្បីរុញច្រានប្រឆាំងការពង្រីកឥទ្ធិពលរបស់ចិននៅក្នុងតំបន់ឥណ្ឌូ-ប៉ាស៊ីហ្វិក។