​

នគរបាល និងមន្ត្រីសុខាភិបាល បាននិយាយថា ការបំផ្ទុះគ្រាប់បែកអត្តឃាតបានបំផ្ទុះនៅវិហារអ៊ីស្លាមចំនួនពីរកន្លែង ក្នុងប្រទេសប៉ាគីស្ថានកាលពីថ្ងៃសុក្រ បណ្តាលឲ្យមនុស្សយ៉ាងហោចណាស់ ៥៧ នាក់ ស្លាប់ រួមទាំងកុមារ៧នាក់ និងជាង៦០នាក់រងរបួស ខណៈអ្នកមានជំនឿប្រារព្ធខួបកំណើតព្យាការី លោក Mohammad។ ភ្លាមៗនោះ ពុំទាន់មានក្រុមណាមួយចេញមុខអះអាងទទួលខុសត្រូវ ចំពោះការវាយប្រហារនេះទេ ដែលចំនួនអ្នកស្លាប់អាចកើនឡើងបន្ថែមទៀត ខណៈមនុស្សជាច្រើនបានរងរបួសធ្ងន់ ហើយអ្នកផ្សេងទៀតបានជាប់នៅក្រោមគំនរបាក់បែក។ មន្ត្រីនគរបាលជាន់ខ្ពស់ លោក មុននៀ អាម៉េដ(Munir Ahmed) បាននិយាយថា នៅក្នុងក្រុង Mastung ខេត្ត Balochistan ភាគនិរតីថា អ្នកបំផ្ទុះគ្រាប់បែក បានបំផ្ទុះគ្រឿងផ្ទុះនៅជិតរថយន្តនគរបាលដែលមនុស្សកំពុងជួបជុំគ្នាសម្រាប់ការដង្ហែ។ យោងតាមមន្ត្រីសង្គ្រោះបាននិយាយថា ការវាយប្រហារលើកទី២ នៅតំបន់ Khyber Pakhtunkhwa ដែលនៅជិតខាងនោះ បណ្តាលឲ្យមនុស្សប្រាំនាក់ស្លាប់ នៅវិហារឥស្លាម ។ ប្រព័ន្ធផ្សព្វផ្សាយ Geo News បានរាយការណ៍ថា ដំបូលបានបាក់រលំសង្កត់លើមនុស្សពី ៣០ ទៅ ៤០ នាក់ នៅក្រោមគំនរបាក់បែក។ មន្ត្រីម្នាក់និយាយថា ការវាយប្រហារនេះទាក់ទងនឹងការបំផ្ទុះចំនួនពីរកន្លែង ដែលមួយកន្លែងនៅច្រកទ្វារចូលវិហារឥស្លាម និងមួយកន្លែងទៀតនៅក្នុងបរិវេណនោះ។ ការកើនឡើងនៃការវាយប្រហារដោយក្រុមសកម្មប្រយុទ្ធ នៅក្នុងខេត្តភាគខាងលិចប្រទេសប៉ាគីស្ថាន បានដាក់ស្រមោលលើការរៀបចំការបោះឆ្នោត និងយុទ្ធនាការជាសាធារណៈនៅក្នុងដំណើរការរហូតដល់ការបោះឆ្នោតជាតិនៅខែមករា ប៉ុន្តែរហូតមកដល់ពេលនេះ ការវាយប្រហារភាគច្រើនបានផ្តោតលើកងកម្លាំងសន្តិសុខ។ ខេត្តចំនួនពីរ មានព្រំដែនជាប់ប្រទេសអាហ្វហ្គានីស្ថាន បានរងការវាយប្រហារក្នុងរយៈពេលប៉ុន្មានឆ្នាំចុងក្រោយនេះ ដោយក្រុមសកម្មប្រយុទ្ធឥស្លាមនិយម ក្នុងគោលបំណងផ្តួលរំលំរដ្ឋាភិបាលប៉ាគីស្ថាន និងតែងតាំងសាខាបស់ពួកគេសម្រាប់ច្បាប់អ៊ីស្លាមដ៏តឹងរ៉ឹង។