ភ្នំពេញ៖ ស្របតាមការអំពាវនាវរបស់សម្តេចនាយករដ្ឋមន្រ្តីកម្ពុជា និងដើម្បីកាត់បន្ថយចំណាយរបស់កម្មករនិយោជិត ម្ចាស់បន្ទប់ជួលមួយកន្លែង ស្ថិតក្នុងខណ្ឌពោធិ៍សែនជ័យ បានឲ្យដឹងថា បានសម្រេចមិនដំឡើងថ្លៃឈ្នួលបន្ទប់ពីកម្មករ កម្មការនីរោងចក្រទេ ហើយការសម្រេចនេះ ក៏មានរយៈពេលប្រមាណជាង១០ឆ្នាំហើយដែរ។

លោក ខន សុជាតិ ម្ចាស់បន្ទប់ជួល ស្ថិតនៅតំបន់ផ្សារទួលពង្រ សង្កាត់ចោមចៅ១ ខណ្ឌពោធិ៍សែនជ័យ បានឲ្យទូរទស្សន៍ព័ត៌មាន ប៊ីធីវី ដឹងថា ផ្ទះលោកមានបន្ទប់ជួលសរុបចំនួន ៨៨បន្ទប់ សម្រាប់ជួលឲ្យកម្មករ កម្មការនីរោងចក្រ។ លោកបានបន្តថា ការសម្រេចមិនដំឡើងថ្លៃឈ្នួលនេះ ដោយសារចង់រួមចំណែកក្នុងការកាត់បន្ថយចំណាយរបស់កម្មកររោងចក្រដែលជួបការលំបាក ពិសេសនៅពេលដែលមានបន្ទុកកើនឡើងត្រូវរ៉ាប់រងក្នុងគ្រួសារ។ជាមួយនេះ លោកបានសំណូមពរឲ្យរដ្ឋាភិបាលជួយសម្រួលបន្ថែមដែរ លើការតបណ្តាញខ្សែអគ្គិសនី ដើម្បីធានាធានាសុវត្ថិភាព ឲ្យបងប្អូនកម្មកររស់នៅដោយភាពសុខស្រួល។

ទាក់ទិនតម្លៃបន្ទប់/ផ្ទះជួលដល់កម្មករ កម្មការនីរោងចក្រនេះដែរ ក្នុងឱកាសចូលរួមអបអរសាទរដល់កម្មករនិយោជិត ដែលទទួលបានការដំឡើងប្រាក់ឈ្នួលអប្បបរមាបន្ថែមទៀតចំនួន ៤ដុល្លារ នៃប្រាក់ឈ្នួលបច្ចុប្បន្ន ២០០ដុល្លារ សម្តេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានអំពាវនាវដល់ម្ចាស់ផ្ទះជួលទាំងអស់ សូមរក្សាថ្លៃជួល ដើម្បីរក្សានូវប្រភពចំណូលរបស់ខ្លួនឯងផង ជួយដល់កម្មករនិយោជិតផង និងជួយរួមចំណែកដល់ការអនុវត្តច្បាប់ស្តីពីភិតិសន្យា ពិសេសដែលនៅជាធរមានផង។ សម្តេចបញ្ជាក់បន្ថែមថា រាជរដ្ឋាភិបាលនឹងខិតខំតភ្ជាប់បណ្តាញអគ្គិសនី និងបណ្តាញទឹកស្អាតដល់គ្រប់បន្ទប់ជួល ដើម្បីជួយដល់ម្ចាស់ផ្ទះជួល និងជួយដល់បងប្អូនកម្មករនិយោជិតដែលជាអ្នកជួលបន្ទប់ផងដែរ៕