​ភ្នំពេញ៖ ព្រះករុណាព្រះបាទ សម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្ដេចព្រះមហាក្សត្រី នរោត្ដម មុនីនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្ដី ថ្លៃថ្នូរ និងសុភមង្គល ព្រះអង្គទាំងទ្វេ បានសព្វព្រះរាជហឫទ័យស្ដេចយាងនិវត្តមកមាតុប្រទេសវិញហើយ តាមព្រះទីនាំងយន្តហោះពិសេស របស់ព្រះរាជាណាចក្រកម្ពុជា។

​យាងនិងអញ្ជើញបង្គំថ្វាយព្រះរាជដំណើររបស់ព្រះអង្គទាំងទ្វេស្តេចយាងនិវត្តមកដល់អាកាសយានដ្ឋានអន្តរជាតិភ្នំពេញ នៅវេលារសៀលថ្ងៃទី៣០ខែកញ្ញានេះ សង្កេតឃើញវត្តមាន សម្ដេចវិបុលសេនាភក្ដី សាយ ឈុំ ប្រធានព្រឹទ្ធសភា សម្តេចមហារដ្ឋសភាធិការបតី ឃួន សុដារី ប្រធានរដ្ឋសភា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ្រ ច័ន្ទមុន្នី សម្តេចអគ្គមហាពញាចក្រី ហេង សំរិន ប្រធានកិត្តិយសក្រុមឧត្តមប្រឹក្សាផ្ទាល់ ព្រះមហាក្សត្រ សម្តេចអគ្គមហាសេនាបតីតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា សម្តេចក្រឡាហោម ស ខេង សម្តេចពិជ័យសេនា ទៀ បាញ់ សម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ មន្ត្រីរាជរដ្ឋាភិបាលព្រមទាំងព្រះរាជវង្សានុវង្ស និងមន្ត្រីអ្នកមុខអ្នកការជាច្រើនរូប។ដោយឡែកឯកអគ្គរដ្ឋទូតចិនប្រចាំកម្ពុជាក៏មានវត្តមានផងដែរ។

សូមបញ្ជាក់ថា៖ព្រះករុណាព្រះបាទ សម្ដេចព្រះបរមនាថ នរោត្ដម សីហមុនី និងសម្ដេចព្រះមហាក្សត្រី នរោត្ដម មុនីនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្ដី ថ្លៃថ្នូរ និងសុភមង្គល ព្រះអង្គទាំងទ្វេ បានយាងចាក ចេញពីមាតុប្រទេស ទៅកាន់ទីក្រុងប៉េកាំងតាំងពីថ្ងៃទី២៨ខែសីហា ឆ្នាំ២០២៣មក ដើម្បីព្រះអង្គទាំងទ្វេស្តេចយាងទៅពិនិត្យនិងព្យាបាលព្រះរាជសុខភាពតាមការកំណត់របស់ក្រុមវេជ្ជបណ្ឌិតចិននិងគង់ប្រថាប់មួយរយៈពេលនៅទីនោះ។ នៅក្នុងឱកាសស្តេចគង់ប្រថាប់នៅទីក្រុងប៉េកាំងមួយរយៈពេលកន្លងមក ព្រះករុណាព្រះបាទ សម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្ដេចព្រះមហាក្សត្រី នរោត្ដម មុនីនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្ដីថ្លៃថ្នូរ និងសុភមង្គល ព្រះអង្គទាំងទ្វេ ក៏បានសព្វព្រះរាជហឫទ័យព្រះបរមរាជានុញ្ញាតប្រោសព្រះរាជទានជូន សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវ បណ្ឌិត អញ្ជើញចូលក្រាបថ្វាយបង្គំគាល់ នាព្រះរាជដំណាក់រដ្ឋធានីប៉េកាំង ខណៈសម្តេចធិបតី និងលោកជំទាវបណ្ឌិតបានអញ្ជើញទៅបំពេញទស្សនកិច្ចជាផ្លូវការនៅប្រទេសចិន បន្ទាប់ពីបានឡើងកាន់តំណែងជានាយករដ្ឋមន្ត្រីថ្មីនៃព្រះរាជាណាចក្រកម្ពុជា។

ព្រះករុណាក៏បានសព្វព្រះរាជហឫទ័យស្តេចយាងព្រះរាជដំណើរតាមព្រះរាជទីនាំងយន្តហោះពិសេសទៅកាន់ទីក្រុង Hangzhou នៃខេត្ត Zhejiang ដើម្បីយាងចូលរួមជាព្រះរាជាធិបតីភាពដ៏ ខ្ពង់ខ្ពស់ក្នុងការប្រកាសបើកកីឡាអាស៊ីលើកទី១៩ តបតាមសេចក្តីក្រាបបង្គំសូមយាងរបស់ ឯកឧត្តម Xi JinPing ប្រធានាធិបតី នៃសាធារណរដ្ឋប្រជាមានិតចិន ។

ព្រះអង្គក៏សព្វព្រះ រាជហឫទ័យ ទទួលព្រះរាជសវនាការជាមួយ ឯកឧត្តម Xi JinPing ប្រធានាធិបតី នៃសាធារណរដ្ឋប្រជាមានិតចិន ក្នុងឱកាស ស្តេចគង់ប្រថាប់បំពេញព្រះរាជកិច្ចនាទីក្រុង Hangzhou ខេត្ត Zhejiangនិងបានបំពេញព្រះរាជកិច្ចសំខាន់ៗជាច្រើន ក្នុងនោះសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជ មាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ជាទីគោរពសក្ការៈដ៏ខ្ពង់ខ្ពស់បំផុត ក្រោមព្រះរាជតម្រិះ ទុកដាក់អំពីការអភិរក្សសត្វកម្រផ្សេងៗក្នុង ព្រះរាជាណាចក្រកម្ពុជា ព្រះអង្គក៏សព្វព្រះរាជហឫទ័យ ប្រោសព្រះរាជទាននូវព្រះរាជអំណោយជាព្រះរាជទ្រព្យដ៏ ថ្លៃថ្លាចំនួន ៥ពាន់ដុល្លារអាមេរិក ជូន សមាគមអភិរក្សដំរី អោវត្តី សម្រាប់ជាវិភាគទានក្នុងសកម្មភាពអភិរក្សសត្វដំរី នៅកម្ពុជាផងដែរ។

ក្នុងឱកាសនៃពិធីកាន់បិណ្ឌបានឈានមកដល់ ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធនិងប្រជារាស្ត្រខ្មែរ មានសេចក្តីសោមនស្សរីករាយដែលព្រះអង្គទាំងទ្វេបានសព្វព្រះរាជហទ័យស្តេចយាងនិវត្តមកគង់ប្រថាប់នៅមាតុប្រទេសវិញ និងសូមបួងសួងដល់ទសបារមី នៃវត្ថុសក្តិសិទ្ធិ ទេវតាថែរក្សាព្រះរាជាណាចក្រកម្ពុជានិងព្រះមហាស្វេតឆ័ត្រ ដួងព្រះវិញ្ញាណក្ខន្ធអតីតៈព្រះមហាក្សត្រ ព្រះមហាក្សត្រីយានីខ្មែរគ្រប់ព្រះអង្គ ជាពិសេសដួងព្រះវិញ្ញាណក្ខន្ធព្រះបរមរតកោដ្ឋ សូមតាមជួយអភិបាល ថែរក្សាគ្រងព្រះអង្គទាំងទ្វេមានព្រះរាជសុខភាពល្អ បរិបូរណ៍ ដើម្បីស្តេចគង់ប្រថាប់ជាម្លប់ដ៏ត្រជាក់ត្រជុំដល់ប្រជារាស្ត្រខ្មែរទូទាំងប្រទេស៕