សៀមរាប៖ នៅថ្ងៃទី២ខែតុលា ឆ្នាំ២០២២នេះ ជប៉ុនប្រគល់សំណង់អគារដ៏ទំនើបមួយដល់មន្ទីរពេទ្យបង្អែកខេត្តសៀមរាប សម្រាប់បំរើសាវាព្យាបាលនិងសង្គ្រោះអ្នកជំងឺ។

ឯកឧត្តមបណ្ឌិត ក្រុស សារ៉ាត់ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តសៀមរាប មានប្រសាសន៍ថា អគារមន្ទីរពេទ្យក្រោមគម្រោងធ្វើឱ្យប្រសើរឡើង របស់មន្ទីរពេទ្យបង្អែក ក្រោមជំនួយឥតសំណងរបស់រាជរដ្ឋាភិបាលជប៉ុន តាមរយៈទីភ្នាក់ងារប្រតិបត្តិការអន្តរជាតិ JICA ដែលបានចាប់ផ្តើមសាងសង់នៅថ្ងៃទី០១ ខែធ្នូ ឆ្នាំ២០២១ ហើយបានបញ្ចប់ក្នុងខែតុលា ឆ្នាំ២០២៣នេះ ជាមួយនឹងការ រៀបចំបំពាក់ឧបករណ៍វេជ្ជសាស្ត្រកម្រិតស្តង់ដារមន្ទីរពេទ្យ។គម្រោងសំណង់អគារ រួមមាន៖ អគារមួយដែលទំហំ២៦គុណនឹង៦៨ ម៉ែត្រ កម្ពស់ បួនជាន់ កំពស់២៧,៥ ម៉ែត្រ ដែលសាងសង់ នៅលើផ្ទៃដីចំនួន៣,៨១១ ម៉ែត្រការេ ហើយសំណង់នេះ ត្រូវបានរៀបចំប្រព័ន្ធគ្រប់គ្រង និងព្យាបាលតាម លក្ខណៈស្តង់ដារ មន្ទីរពេទ្យ ។

ក្រៅពីការរៀបចំរចនាសម្ព័ន្ធខាងក្នុង អគារនេះក៏មានបណ្តាញទំនាក់ទំនង និងមាន ជណ្តើរថ្មើរជើងចំនួនពីរ និងបំពាក់ជណ្តើរយន្តចំនួនពីរផងដែរ។

អគារមន្ទីរពេទ្យថ្មីនេះ ត្រូវបានដាក់ឈ្មោះថា “ មណ្ឌលផ្តល់សេវាផ្នែកវះកាត់ នៃមន្ទីពេទ្យបង្អែកខេត្តសៀមរាប”៕