ប្រធានាធិបតីឥណ្ឌូនេស៊ី លោក Joko Widodo នៅថ្ងៃចន្ទ (ទី២ ខែតុលា) នេះ បានសម្ពោធរថភ្លើងល្បឿនលឿនតម្លៃ ៧,៣ពាន់លានដុល្លារ ដែលតភ្ជាប់រដ្ឋធានីរបស់ប្រទេសនេះ ជាមួយនឹងទីក្រុង Bandung ពោលគឺជាគម្រោងគាំទ្រដោយប្រទេសចិន ដែលត្រូវបានរាំស្ទះដោយបញ្ហាជាច្រើន។

ផ្លូវដែកប្រវែង ១៤២គីឡូម៉ែត្រ ដែលជាគម្រោងហេដ្ឋារចនាសម្ព័ន្ធដ៏លេចធ្លោមួយរបស់លោកប្រធានាធិបតី Widodo និងជាផ្នែកមួយនៃគំនិតផ្តួចផ្តើមខ្សែក្រវាត់ និងផ្លូវរបស់ប្រទេសចិន បានជួបប្រទះនឹងបញ្ហាជាច្រើន រាប់ចាប់ពីបញ្ហាលទ្ធកម្មដីធ្លី ការពន្យារពេលដោយសារជំងឺរាតត្បាតកូវីដ-១៩ និងការចំណាយខ្ពស់ហួសហេតុ។

ការដាក់ឲ្យដំណើរការ នៅថ្ងៃចន្ទ សម្រាប់រថភ្លើងល្បឿនលឿន ដែលមានឈ្មោះថា «Whoosh» នេះ គឺនៅឆ្ងាយពីគោលដៅដើមដំបូងនៃប្រតិបត្តិការ ក្នុងឆ្នាំ២០១៩។ លោក Widodo បាននិយាយអំឡុងពេលដាក់ឲ្យដំណើរការរថភ្លើងនេះថា៖ «ឈ្មោះនេះ ត្រូវបានដាក់ដោយយកតាមសំឡេងដ៏លឿនរបស់រថភ្លើង។ ល្បឿនប្រតិបត្តិការអតិបរមារបស់រថភ្លើងនេះ អាចឡើងដល់ ៣៥០គីឡូម៉ែត្រ ក្នុងមួយម៉ោង»។

ទេសរដ្ឋមន្ត្រីដែលមើលការខុសត្រូវលើគម្រោងនេះ លោក Luhut Pandjaitan បាននិយាយនៅក្នុងពិធីសម្ពោធថា ការសាកល្បងជិះរថភ្លើង ដោយមិនគិតថ្លៃលើរថភ្លើងល្បឿនលឿននេះ ដែលបានដំណើរការតាំងពីសប្តាហ៍ទី២ នៃខែកញ្ញា នឹងត្រូវបានពន្យារពេល ហើយតម្លៃសំបុត្រនឹងត្រូវអនុវត្តនៅពាក់កណ្តាលខែតុលា។

សូមបញ្ជាក់ថា ក្រុមហ៊ុនបុត្រសម្ព័ន្ធរបស់ឥណ្ឌូនេស៊ី និងចិន ជាអ្នកសាងសង់ផ្លូវរថភ្លើងនេះ៕