កាលពីថ្ងៃអាទិត្យម្សិលមិញ ប្រធានក្រុមហ៊ុនប្រេង និងឧស្ម័ន បានពិភាក្សាជាមួយប្រធានឧស្សាហកម្មធន់ធ្ងន់ នៅប្រទេសអារ៉ាប់រួម ក្នុងកិច្ចខិតខំមួយដើម្បីឯកភាពគ្នាលើការប្តេជ្ញាចិត្តយ៉ាងមុតមាំ ក្នុងការកាត់បន្ថយការបំភាយឧស្ម័នកាបូនិក មុនកិច្ចប្រជុំកំពូលអាកាសធាតុរបស់អង្គការសហប្រជាជាតិ(COP28) នាខែក្រោយ ។

 ប្រធានប្រតិបត្តិកិច្ចប្រជុំ COP28 លោក Adnan Amin និយាយថា គោលដៅនៃជំនួបនេះ គឺដើម្បីធ្វើឲ្យអ្នកនៅក្នុងឧស្សាហកម្មធំៗ ប្តេជ្ញាចិត្តកាត់បន្ថយការបំភាយឧស្ម័នកាបូន ដែលនឹងជួយកំណត់ការឡើងកម្តៅផែនដី ។

 លោក Amin និយាយថា អ្វីដែលពួកយើងបានធ្វើនៅថ្ងៃនេះ គឺជាអ្វីមួយដែលពុំធ្លាប់មាននៅក្នុងដំណើរការកិច្ចប្រជុំ COP ។ វានឹងរួបរួមទាំងតម្រូវការ និងភាគីផ្គត់ផ្គង់ក្នុងលក្ខខណ្ឌបំភាយឧស្ម័ន ។

 លោកបន្តថា ពួកយើងសង្ឃឹមថានឹងឈានដល់កិច្ចព្រមព្រៀង មុនកិច្ចប្រជុំកំពូល COP28 ហើយបើសិនជាឧស្សាហកម្មប្រេង និងឧស្ម័នចុះហត្ថលេខាលើកិច្ចព្រមព្រៀងកាត់បន្ថយសារធាតុកាបូន ហើយបើសិនជាពួកគេចុះហត្ថលេខាលើសារធាតុមេតាន កាត់បន្ថយការបំភាយឧស្ម័ន ការបំភាយឧស្ម័នមេតាន នោះនឹងក្លាយជាការរួមចំណែកដ៏ធំមួយលើការជជែកដេញដោលនេះ ។

 វាត្រូវបានគេមើលឃើញថាជាឱកាសដ៏សំខាន់មួយ សម្រាប់រដ្ឋាភិបាលដើម្បីបង្កើនវិធានការកំណត់ការឡើងកម្តៅផែនដី ក្នុងនោះរបាយការណ៍មកទល់នឹងពេលនេះឃើញប្រទេសច្រើន ពុំបានឈានដល់ការសន្យាកំណត់ការឡើងសីតុណ្ហភាព ១,៥អង្សាសេ ។ ការរួមបញ្ចូលក្រុមតំណាងប្រេង និងឧស្ម័ន គឺផ្ទុយពីកិច្ចប្រជុំកំពូលបម្រែបម្រួលអាកាសធាតុអង្គការសហប្រជាជាតិកាលពីឆ្នាំ ២០២១នៅស្កុតលែន ជាទីដែលក្រុមហ៊ុនថាមពល ត្អូញត្អែថាពួកគេ ត្រូវបានគេរារាំងមិនឲ្យចូលរួមព្រឹត្តការណ៍ ។

 សូមបញ្ជាក់ថា កិច្ចប្រជុំកំពូល COP28គ្រោងនឹងរៀបចំឡើងនៅទីក្រុង ចន្លោះថ្ងៃទី ៣០ ខែវិច្ឆិកា និងថ្ងៃទី ១២ ខែធ្នូ ៕