បាល់ទាត់៖ លោក ខូវ ឆាយ អគ្គលេខាធិការសមាគម កីឡាបាល់ទាត់កងយោធពលខេមរភូមិន្ទបានបង្ហើបថា ដំបូងឡើយលោកមិនសូវមានសង្ឃឹមក្នុងការនាំយកលោក Lee Tae Hoon មកដឹកនាំក្រុមនោះទេ តែដោយសារកត្តាសំខាន់មួយ គឺការមានទិសដៅស្របគ្នាក្នុងការអភិវឌ្ឍន៍បាល់ទាត់ ទើបឈានដល់កិច្ចព្រមព្រៀង និងតែងតាំងអតីតគ្រូបង្វឹកក្រុមជម្រើសជាតិកម្ពុជារូបនេះ ជាអ្នកចាត់ការទូទៅក្រុមថ្មីតែម្ដង។
ការលើកឡើងនេះបានធ្វើឡើងក្នុងសន្និសីទសារព័ត៌មាន ស្ដីពីការប្រកាសផ្លូវការអ្នកចាត់ការក្រុមថ្មី របស់សមាគមកីឡាបាល់ទាត់កងយោធពលខេមរភូមិន្ទ គឺលោក Lee Tae Hoon ក្រោមកិច្ចសន្យារយៈពេល ២ឆ្នាំកាលពីព្រឹកថ្ងៃទី១ ខែមិថុនា ឆ្នាំ២០២១ នេះនៅសណ្ឋាគារសូហ្វីតែល។ លោក ខូវ ឆាយ បន្ដថា គ្រូបង្វឹកសញ្ជាតិកូរ៉េខាងត្បូងនេះ នឹងត្រូវកាត់តួនាទីដូចអ្នកចាត់ការទូក្រុមជម្រើសជាតិកម្ពុជាលោក Keisuke Honda ពោលគឺលោកនឹងគ្រប់គ្រងលើការបច្ចេកទេសរួមរបស់ក្លិប រួមទាំងគ្រូបង្វឹកផងដែរ។ ក្លិបរំពឹងថា វត្តមានរបស់លោក Lee Tae Hoon នឹងធ្វើឲ្យសមាគមកីឡាបាល់ទាត់ កងយោធពលខេមរភូមិន្ទកាន់តែរីកចម្រើន និងមានការប្រកួតប្រជែងកាន់តែខ្ពស់ទាំងក្នុងលីគ ពានសម្ដេចតេជោ ហ៊ុន សែន និងការប្រកួតផ្សេងៗទៀត។ ទន្ទឹមជាមួយគ្នាលោក Lee Tae Hoon ក៏បានសម្ដែងនូវសេចក្ដីរីករាយចំពោះការទទួលបានឱកាស ដើម្បីដឹកនាំក្រុមបាល់ទាត់នៅកម្ពុជាវិញផងដែរ។ លោកបានប្ដេជ្ញាចិត្តនឹងប្រើប្រាស់បទពិសោធន៍ និងសមត្ថភាពដែលខ្លួនមាន ដើម្បីចូលរួមអភិវឌ្ឍន៍សមាគមកីឡាបាល់ទាត់ កងយោធពលខេមរភូមិន្ទឲ្យរីកចម្រើន ហើយក្លាយជាក្លិបមានឈ្មោះបោះសំឡេងមួយក្នុងតំបន់នាថ្ងៃអនាគត។
សូមបញ្ជាក់ថា លោក Lee Tae Hoon បានមកបម្រើការងារនៅកម្ពុជាដំបូង ជាមួយសហព័ន្ធកីឡាបាល់ទាត់កម្ពុជា ក្នុងនាមគ្រូបង្វឹកក្រុមជម្រើសជាតិកម្ពុជាកាលពីឆ្នាំ២០១០ រហូតដល់ឆ្នាំ២០១៨ ទើបលោកផុតកិច្ចសន្យាជាមួយសហព័ន្ធកីឡាបាល់ទាត់កម្ពុជា លោកក៏ផ្ទេរទៅដឹកនាំក្លិប Hoang Anh Gia Lai នៃលីគកំពូលវៀតណាម។ ប៉ុន្តែរយៈពេល ២ឆ្នាំដែលលោកដឹកនាំក្រុមលីគកំពូលវៀតណាមនេះ ហាក់ទទួលលទ្ធផលមិនសូវល្អឡើយ ដែលនាំឲ្យក្លិបសម្រេចចែកផ្លូវគ្នាជាមួយលោកតែម្ដង មុនលោកត្រឡប់មកកម្ពុជា និងទទួលបានការងារថ្មី ជាអ្នកចាត់ការក្រុមថ្មីនៃសមាគមកីឡាបាល់ទាត់ កងយោធពលខេមរភូមិន្ទពេលនេះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
