ជនអន្តោប្រវេសន៍ដែលត្រូវបានជួយសង្រ្គោះនៅជិតតំបន់ឆ្នេរប្រទេសលីប៊ី នៅលើនាវាសង្រ្គោះ Geo Barents របស់ក្រុមគ្រូពេទ្យគ្មានព្រំដែន បានមកកំពង់ផែ Civitavecchia ប្រទេសអ៊ីតាលី កាលពីថ្ងៃអាទិត្យ ។

ជនអន្តោប្រវេសន៍បានចុះពីលើនាវា ស្របពេលដែលក្រុមស្ម័គ្រចិត្តរបស់ក្រុមគ្រូពេទ្យគ្មានព្រំដែន នាំគ្នាទះដៃ ។

នាវា Geo Barents បានជួយសង្រ្គោះមនុស្សប្រុស ៦១នាក់ មកពីបង់ក្លាដែស ប៉ាគីស្ថាន អេហ្ស៊ីប នីហ៊្សេរីយ៉ា និងប្រទេសស៊ីរី ពីលើទូកឈើផ្ទុកលើសចំណុះ ។

ប្រតិបត្តិការនេះ បានធ្វើឡើងនៅដែនសមុទ្រអន្តរជាតិ ជិតតំបន់ឆ្នេរប្រទេសលីប៊ី ស្ថិតនៅភាគកណ្តាលសមុទ្រមេឌីទែរ៉ាណេ កាលពីថ្ងៃព្រហស្បតិ៍សប្តាហ៍មុន ។ 

ក្រុមគ្រូពេទ្យគ្មានព្រំដែន បានបង្ហោះសារនៅលើបណ្តាញព័ត៌មានសង្គម Xដែលជាអតីតបណ្តាញព័ត៌មានសង្គម Twitter កាលពីថ្ងៃអាទិត្យថា ប្រតិបត្តិការជួយសង្រ្គោះរបស់ពួកគេ បច្ចុប្បន្នបានបញ្ចប់ទាំងស្រុង ។

ប្រទេសអ៊ីតាលី បានមើលឃើញការមកដល់របស់ជនអន្តោប្រវេសន៍ជាង ១៣៣.០០០នាក់ ឆ្លងកាត់តាមសមុទ្រមេឌីទែរ៉ាណេ ក្នុងឆ្នាំ ២០២៣នេះ ពោលគឺច្រើនជាងអំឡុងពេលតែមួយកាលពីឆ្នាំ ២០២២ ដែលមានតិចជាង ៧ម៉ឺននាក់ប៉ុណ្ណោះ បើទោះបីជាលោកស្រីនាយករដ្ឋមន្រ្តី Giorgia Meloni សន្យាកាត់បន្ថយលំហូរជនអន្តោប្រវេសន៍ថ្មី មកពីតំបន់ភាគខាងជើងអាហ្វ្រិក ពេលលោកស្រី ឡើងកាន់អំណាចក៏ដោយ ៕