រដ្ឋមន្ត្រីប្រចាំរដ្ឋ Manipur នៅភាគឦសានប្រទេសឥណ្ឌា លោក N. Biren Singh កាលពីថ្ងៃអាទិត្យ (ទី១ ខែតុលា) បាននិយាយថា ភ្នាក់ងារសន្តិសុខបានចាប់ខ្លួនជនសង្ស័យ ៤នាក់ ពាក់ព័ន្ធនឹងការសម្លាប់និស្សិត ២រូប ដោយការស្លាប់នោះ បាននាំឲ្យមានការតវ៉ាទ្រង់ទ្រាយធំ នៅក្នុងរដ្ឋ ដែលរងគ្រោះដោយការបង្កអំពើហិង្សាពីសំណាក់ជនជាតិភាគតិច។

ដោយចាត់ទុកថា នេះគឺជាស្នាដៃដ៏ធំនោះ លោក Singh បាននិយាយថា ការចាប់ខ្លួននេះ ត្រូវបានធ្វើឡើង បន្ទាប់ពីមានកិច្ចប្រឹងប្រែងរួមគ្នារបស់យោធាឥណ្ឌា កងកម្លាំងប៉ារ៉ាយោធា កងកម្លាំងប្រដាប់អាវុធ Assam (AR) និងនគរបាលរដ្ឋប្រចាំ។

ការសម្លាប់និស្សិត ២នាក់មកពីកុលសម្ព័ន្ធ Meiti បានបង្កឲ្យមានការប៉ះទង្គិចគ្នាយ៉ាងហិង្សាជាថ្មីម្ដងទៀត រវាងក្រុមកុលសម្ព័ន្ធ Kukis និង Meitis។ និស្សិតទាំង ២នាក់នោះ បានបាត់ខ្លួននៅក្នុងខែកក្កដាឆ្នាំនេះ ហើយរូបភាពនៃសាកសពរបស់ពួកគេ បានលេចឡើងនៅលើប្រព័ន្ធអ៊ីនធឺណិត កាលពីសប្តាហ៍មុន។

អាជ្ញាធរបានប្រកាសបម្រាមគោចរមិនកំណត់ពេល នៅទីក្រុង Imphal និងតំបន់មួយចំនួនរបស់រដ្ឋ Manipur បន្ទាប់ពីនិស្សិតជាង ៨០នាក់បានរងរបួស កាលពីថ្ងៃចន្ទ (ទី២៥ ខែកញ្ញា) ក្នុងហេតុការណ៍ប៉ះទង្គិចគ្នា បន្ទាប់ពីមានការតវ៉ាប្រឆាំង ពាក់ព័ន្ធនឹងការចោទប្រកាន់ពីបទចាប់ពង្រត់ និងសម្លាប់និស្សិតទាំង ២នាក់នោះ៕