អេស្ប៉ាញ បានជួយសង្រ្គោះជនអន្តោប្រវេសន៍ ៥៨នាក់ ដែលជាប់ខ្លួនទាំងយប់ ស្ថិតនៅចម្ងាយប្រហែល ១៤៥គ.ម ពីប្រជុំកោះ Canary នាព្រឹកថ្ងៃចន្ទនេះ ។ 

ជនអន្តោប្រវេសន៍ដែលរួមទាំងស្រ្តី ៩នាក់ និងបុរស ៤៩នាក់ ត្រូវបានបញ្ជូនមកកាន់កំពង់ផែ Arguineguin នៃកោះ Gran Canaria ហើយត្រូវបានទទួលយកដោយក្រុមការងារកាកបាទក្រហម ។ 

ផ្លូវអន្តោប្រវេសន៍ក្នុងសមុទ្រអាត្លង់ទិក ស្ថិតនៅក្នុងចំណោមផ្លូវដ៏គ្រោះថ្នាក់ស្លាប់មនុស្សច្រើនបំផុតនៅលើពិភពលោក ហើយតាមធម្មតាត្រូវបានប្រើប្រាស់ដោយជនអន្តោប្រវេសន៍មកពីអនុតំបន់សាហារ៉ារបស់អាហ្រ្វិក ដែលព្យាយាមធ្វើដំណើរទៅកាន់អឺរ៉ុប ជាពិសេសអំឡុងរដូវក្តៅ ពេលដែលស្ថានភាពអាកាសធាតុអំណោយផល ។ 

ទិន្នន័យរដ្ឋាភិបាលអេស្ប៉ាញ ឃើញមនុស្ស ១៤.៩៧៦នាក់ បានធ្វើដំណើរទៅដល់ប្រជុំកោះ Canary ចន្លោះខែមករា និងថ្ងៃទី ៣០ ខែកញ្ញា ពោលគឺមាន ១៩,៨ភាគរយ ច្រើនជាងពេលតែមួយកាលពីឆ្នាំមុន ៕