រដ្ឋអាជ្ញារបស់កោះតៃវ៉ាន់ បានឲ្យដឹង នៅថ្ងៃចន្ទ (ទី២ ខែតុលា) នេះ ថា ពួកគេកំពុងស៊ើបអង្កេតការចោទប្រកាន់ ដែលថា មានបុគ្គលព្យាយាមជ្រៀតជ្រែក ក្នុងកម្មវិធីនាវាមុជទឹករបស់កោះនេះ ហើយព័ត៌មានលម្អិតអំពីនាវាត្រូវបានបែកធ្លាយ ជាអ្វី ដែលជាការរំលោភសន្តិសុខយ៉ាងធ្ងន់ធ្ងរ។

កោះតៃវ៉ាន់បានបង្ហាញនាវាមុជទឹកផលិតក្នុងស្រុកដំបូងរបស់ខ្លួន កាលពីថ្ងៃព្រហស្បតិ៍ (ទី២៨ ខែកញ្ញា) ដែលជាជំហានដ៏សំខាន់មួយនៅក្នុងគម្រោង ដែលមានគោលបំណងពង្រឹងការការពារ និងការរារាំងរបស់កោះនេះប្រឆាំងនឹងកងទ័ពជើងទឹករបស់ប្រទេសចិន ទោះបីជានាវានេះនឹងមិនដាក់ឲ្យមានប្រតិបត្តិការ សម្រាប់រយៈពេល ២ឆ្នាំទៀតក៏ដោយ។

លោក Huang Shu-kuang ដែលកំពុងដឹកនាំកម្មវិធីនេះ កាលពីសប្តាហ៍មុន បានប្រាប់ប្រព័ន្ធផ្សព្វផ្សាយក្នុងស្រុកថា សមាជិកសភា ដែលលោកមិនបញ្ចេញឈ្មោះ បានធ្វើឲ្យមានការលំបាកដល់កម្មវិធី ក្នុងការទិញឧបករណ៍សំខាន់ៗ ហើយបន្ថែមថា អ្នកម៉ៅការម្នាក់ ដែលមិនបានឈ្នះការដេញថ្លៃ បានបញ្ជូនព័ត៌មានទៅចិន។

ការិយាល័យរដ្ឋអាជ្ញាជាន់ខ្ពស់របស់កោះតៃវ៉ាន់ នៅក្នុងសេចក្តីថ្លែងការណ៍ខ្លីមួយ បានឲ្យដឹងថា ការចោទប្រកាន់របស់លោក Huang បានទាក់ទាញឲ្យមាន «ការយកចិត្តទុកដាក់យ៉ាងខ្លាំង» ដែលផ្តល់ផលប៉ះពាល់ដល់សន្តិសុខ និងការការពារជាតិ។

ការិយាល័យបានប្រាប់ថា ខ្លួនបានណែនាំរដ្ឋអាជ្ញាឲ្យ «ស៊ើបអង្កេតករណីនេះឲ្យបានឆាប់តាមដែលអាចធ្វើទៅបាន ដើម្បីការពារសន្តិសុខជាតិ»។ តែយ៉ាងណាក្ដី ការិយាល័យមិនបានផ្តល់ព័ត៌មានលម្អិត ឬឈ្មោះនោះទេ៕