បាល់ទាត់៖ គិតត្រឹមពេលនេះនៅសល់មិនដល់មួយថ្ងៃទៀតទេ ការប្រកួតជម្រុះបាល់ទាត់ពិភពលោកឆ្នាំ២០២២ កាតា និងពានរង្វាន់ទ្វីបអាស៊ី២០២៣ ចិនជុំទី២ តំបន់អាស៊ីរវាងម្ចាស់ផ្ទះបារ៉ែន និងកម្ពុជាចូលមកដល់។
ការប្រកួតនេះធ្វើឡើងនៅពហុកីឡដ្ឋានជាតិបារ៉ែនវេលាម៉ោង ៧និង៣០នាទីយប់ត្រូវនឹងម៉ោង ១១និង៣០នាទីយប់ម៉ោងនៅកម្ពុជា ហើយទូរទស្សន៍បាយ័ន និងប៊ីធីវីផ្សាយផ្ទាល់ពីទីនោះ។ ចំពោះមុខក្រុមដែលដឹកនាំដោយលោក ហុងដា កំពុងតែត្រៀមលក្ខណៈដោយបានធ្វើការហ្វឹកហាត់ជាប្រចាំ បន្ទាប់ពីទៅដល់ប្រទេសបារ៉ែនដោយសុវត្ថិភាព។ ជើងទី១ នៅរាជធានីភ្នំពេញ បារ៉ែនឈ្នះកម្ពុជា ១ទល់នឹង០ នៅនាទីទី៧៨ ដោយកីឡាករ Komail Al Aswad។ ទោះបីបញ្ចប់ ៥ប្រកួតបានត្រឹមតែ ១ពិន្ទុ ជម្រើសជាតិកម្ពុជានៅមានសង្ឃឹមខ្លះដែរ បើឈ្នះ ៣ប្រកួតនៅសល់នេះ។
ចំណែកបារ៉ែនបច្ចុប្បន្នឈរនៅលេខ២ មាន ៩ពិន្ទុ ចាញ់ក្រុមលេខ១ អ៊ីរ៉ាក់ ២ពិន្ទុ តែនាំមុខអ៊ីរ៉ង់ ៣ពិន្ទុ។ បារ៉ែនបានដាក់គោលដៅឈ្នះ ៣ប្រកួតនៅសល់នេះ ខណៈ ២លើកកន្លងទៅប្រកួតបាល់ទាត់ពិភពលោក ២០០៦ នៅអាល្លឺម៉ង់ និង២០១០ អាហ្វ្រិកខាងត្បូង បារ៉ែនជិតបានលេងជុំចុងក្រោយ តែចាញ់ការប្រកួត Playoff អន្តរទ្វីបជាមួយទ្រីណាដាត និងតូបាកូ និងណូវែលហ្សឺឡង់។ សូមជម្រាបជូនថា ប្រកួតបន្ទាប់ថ្ងៃទី៧ ខែមិថុនា កម្ពុជាប្រកួតជាមួយអ៊ីរ៉ាក់ និងថ្ងៃទី១១ ខែមិថុនា កម្ពុជាប្រកួតជាមួយអ៊ីរ៉ង់៕
អត្ថបទ៖ គង់ ហួន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
