ភ្នំពេញ ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានបញ្ជាក់ថា ចំពោះបុគ្គលរូបណា ដែលល្មើសពាក់ព័ន្ធអាល់កុលក្លែងបន្លំ ឬអាល់កុលក្លែងក្លាយ នឹងប្រឈមមុខចំពោះផ្លូវច្បាប់ ដូចជា ការព្យួរ ការដកហូត ការលុបចោលវិញ្ញាបនបត្រ ឬអាជ្ញាប័ណ្ណ ការពិន័យអន្តរការណ៍ ទោសពិន័យជាប្រាក់ ឬឈានដល់ទោសដាក់ពន្ធធនាគារ។
ឯកឧត្តម ផាន អូន អគ្គនាយក នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ នៃក្រសួងពាណិជ្ជកម្ម នៅព្រឹកថ្ងៃទី២ ខែមិថុនា ឆ្នាំ២០២១នេះ បានថ្លែងថា មន្ត្រីស៊ើបអង្កេតក្តី នគរបាលយុត្តិធម៌ក្តី ជានិច្ចកាលអគ្គនាយកដ្ឋាន ក.ប.ប. តែងតែចាត់វិធានការដោយអនុលោមតាមនីតិវិធីច្បាប់ ពិសេសច្បាប់ស្តីពីការគ្រប់គ្រងគុណភាព សុវត្ថិភាព លើផលិតផលទំនិញ និងសេវា និងច្បាប់ស្តីពីកិច្ចការពារអ្នកប្រើប្រាស់ទៅតាមទំហំនៃបទល្មើស ហើយករណីធ្ងន់ធ្ងរកសាងសំណុំរឿងបញ្ជូនទៅតុលាការ។
ឯកឧត្តម ផាន អូន បានបន្ថែមថា ទាក់ទិនករណីខាងលើនេះ ការបង្ក្រាបបទល្មើសពាក់ព័ន្ធអាល់កុលក្លែងបន្លំក្តី ឬអាល់កុលក្លែងក្លាយឆ្នាំ២០២១នេះ មានបរិមាណថយចុះចំនួនប្រមាណជាង ៣០តោន បើធៀបនឹងរយៈពេលដូចគ្នា និងឆ្នាំ២០២០ ដែលមានប្រមាណជាង ៨០តោន។
លោក ឆៃ សុវណ្ណ អាជីវករលក់ម៉ាស់ និងអាល់កុល នៅម្តុំផ្លូវ៦០ម៉ែត្រ រាជធានីភ្នំពេញ បានគាំទ្រលើចំណាត់ការខាងលើនេះ ចំពោះបុគ្គលដែលគិតប្រយោជន៍របស់ខ្លួនធំជាងប្រជាពលរដ្ឋដែលទិញយកទៅប្រើប្រាស់ក្នុងគោលបំណងសម្លាប់មេរោគ។
សូមបញ្ជាក់ថា គិតក្នុងរយៈពេលពេញ១ខែឧសភា កន្លងទៅនេះ ដោយមានការណែនាំ និងចង្អុលបង្ហាញរបស់ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ បានចុះបង្ក្រាប និងរឹបអូសអាល់កុលក្លែងក្លាយ ឬ មេតាណុលសរុបចំនួនប្រមាណជាង ៥៣តោនឯណោះ៕
អត្ថបទ ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
