WHO៖ អង្គការសុខភាពពិភពលោក (WHO) បានផ្តល់អនុសាសន៍កាលពីថ្ងៃចន្ទ (២ តុលា) ឱ្យប្រើប្រាស់វ៉ាក់សាំងការពារជំងឺគ្រុនចាញ់លើកទីពីរ ដើម្បីទប់ស្កាត់ជំងឺគំរាមកំហែងអាយុជីវិត ដែលរីករាលដាលដល់មនុស្សដោយសារប្រភេទមូសខាំមួយចំនួន។

ប្រធានអង្គការសុខភាពពិភពលោក លោគ Tedros Adhanom Ghebreyesus បានប្រាប់សន្និសីទសារព័ត៌មាននៅទីក្រុងហ្សឺណែវ ថា វ៉ាក់សាំងថ្មីប្រភេទ R21/Matrix-M ដែលបង្កើតឡើងដោយសាកលវិទ្យាល័យ Oxford របស់ចក្រភពអង់គ្លេស នឹងត្រូវដាក់ឱ្យប្រើប្រាស់នៅក្នុងប្រទេសអាហ្រ្វិកមួយចំនួននៅដើមឆ្នាំ២០២៤ ខាងមុខនេះ និងអាចរកទិញបាននៅពាក់កណ្តាលឆ្នាំ២០២៤ នៅក្នុងប្រទេសដទៃទៀត។ 

វ៉ាក់សាំងចំនួនមួយដូស នឹងត្រូវចំណាយចាប់ពី ២ដុល្លារទៅ ៤ដុល្លារអាមេរិកប៉ុណ្ណោះ។ វ៉ាក់សាំង R21/Matrix-M ត្រូវបានផលិតឡើងដោយវិទ្យាសា្ថនស្រាវជ្រាវវ៉ាក់សាំង Serum Institute នៃប្រទេសឥណ្ឌា ហើយប្រើប្រាស់បច្ចេកវិទ្យាបន្ស៉ាំវីរុស Matrix M adjuvant របស់ក្រុមហ៊ុនឳសថ Novavax សហរដ្ឋអាមេរិកផងដែរ៕