ភ្លើងឆេះព្រៃ និងភ្លើងឆេះដីល្បាប់ជាង ៣០០កន្លែងនៅកោះស៊ូម៉ាត្រា ប្រទេសឥណ្ឌូនេស៊ី បង្កឲ្យកើតមានផ្សែងអ័ព្ទពេញផ្ទៃមេឃនៅទូទាំងតំបន់កាលពីថ្ងៃចន្ទ បង្ខំឲ្យក្រុមមន្រ្តីរដ្ឋាភិបាល ស្នើសុំប្រជាពលរដ្ឋធ្វើការពីផ្ទះ ។ 

 លោក Iriansyahគឺជាប្រធានទីភ្នាក់ងារគ្រប់គ្រងគ្រោះមហន្តរាយខេត្តស៊ូម៉ាត្រាខាងត្បូង និយាយថា យោធា ក្រុមនគរបាល និងរដ្ឋាភិបាលក្នុងស្រុក កំពុងធ្វើការជាមួយគ្នា ដើម្បីពន្លត់ភ្លើងឆេះព្រៃ ដែលបានឆាបឆេះ ៣១៦កន្លែងនៅទូតាំងខេត្តស៊ូម៉ាត្រាខាងត្បូង ប៉ុន្តែការងាររបស់ពួកគេ មានសភាពស្មុគស្មាញខ្លាំងដោយសារតែអាកាសធាតុស្ងួតខ្លាំង ។ 

 ផ្សែងអ័ព្ទ បានរសាត់អណ្តែតពីភ្លើងឆេះព្រៃ ឆ្ពោះទៅកាន់ទីក្រុងប៉ាលឹមបាង រដ្ឋធានីរបស់ខេត្តប៉ាលឹមបាងខាងត្បូង បណ្តាលឲ្យកើតមានស្ថានភាពខ្យល់គ្មានសុខភាពសម្រាប់មនុស្ស ១,៧លាននាក់ ដែលរស់នៅតំបន់នោះ ។ 

 លោក Iriansyah ដែលដូចគ្នានឹងប្រជាពលរដ្ឋឥណ្ឌូនេស៊ីជាច្រើនទៀតដែរប្រើឈ្មោះតែមួយ បាននិយាយថា មាននូវសក្តានុពលសម្រាប់មនុស្សទទួលរងការឆ្លងផ្លូវដង្ហើម ក្អក ដកដង្ហើមខ្លី និងផ្សាភ្នែក ។ 

 គួរឲ្យដឹងថា កាលពីសប្តាហ៍មុន រដ្ឋាភិបាលនៅខេត្តស៊ូម៉ាត្រាខាងត្បូង បានអំពាវនាវឲ្យសាលារៀនពន្យាពេលម៉ោងចូលរៀនរបស់ពួកគេ ពេលដែលនិន្នាការផ្សែងអ័ព្ទ នឹងថយចុះនៅពេលថ្ងៃ ប៉ុន្តែកាលពីថ្ងៃចន្ទម្សិលមិញ សាលារៀន បានស្នើសុំឲ្យសិស្សសាលារៀនតាមអនឡាញវិញ ស្របពេលដែលគុណភាពខ្យល់កាន់តែអាក្រក់ទៅ ហើយនិងត្រូវបានគេចាត់ទុកថាស្ថិតនៅក្នុងកម្រិតគ្រោះថ្នាក់ ៕