សមាជិកព្រឹទ្ធសភាអាមេរិកមកពីគណបក្សទាំង២ ក្នុងនោះរួមទាំងមេដឹកនាំសំឡេងភាគច្រើនលោក Chuck Schumer ត្រូវបានគេរាយការណ៍ថា គ្រោងនឹងធ្វើទស្សនកិច្ច នៅប្រទេសចិន នាសប្តាហ៍ក្រោយជាមួយនឹងក្តីសង្ឃឹមថា នឹងជួបជាមួយប្រធានាធិបតីចិន លោក ស៊ី ជីងពីង (Xi Jinping)។

ទីភ្នាក់ងារសារព័ត៌មាន Bloomberg បានរាយការណ៍ កាលពីថ្ងៃចន្ទ (ទី២ ខែតុលា០ ថា សមាជិកព្រឹទ្ធសភាមកពីគណបក្សសាធារណរដ្ឋ នៅក្នុងក្រុមនេះ បានសម្តែងនូវទំនុកចិត្តថា ការសន្ទនាកាន់តែច្រើននឹងនាំទៅរកឱកាស និងលទ្ធភាពកាន់តែច្រើន ក្នុងការដោះស្រាយជម្លោះ រវាងទីក្រុងប៉េកាំង និងវ៉ាស៊ីនតោន។

ខ្សែទូរស័ព្ទទាន់ហេតុការណ៍ រវាងយោធាអាមេរិក និងចិន ត្រូវបានកាត់ផ្តាច់ ហើយទំនាក់ទំនងទ្វេភាគីកាន់តែជាប់គាំង បន្ទាប់ពីប្រធានសភាអាមេរិក លោកស្រី Nancy Pelosi បានទៅបំពេញទស្សនកិច្ចនៅកោះតៃវ៉ាន់ កាលពីខែសីហា ឆ្នាំ២០២២។ ចាប់តាំងពីខែមិថុនាមក រដ្ឋមន្ត្រីការបរទេសអាមេរិកលោក Antony Blinken និងសមាជិកសំខាន់ៗផ្សេងទៀតនៃរដ្ឋបាលរបស់ប្រធានាធិបតីលោក Joe Biden បានទៅបំពេញទស្សនកិច្ចនៅប្រទេសចិន ដែលជាការព្យាយាមរក្សាស្ថិរភាពទំនាក់ទំនង តាមរយៈការសន្ទនា។

លោក Biden បានបង្ហាញនូវការត្រៀមខ្លួនរួចជាស្រេច ក្នុងការជួបជាមួយលោក ស៊ី នៅខាងក្រៅវេទិកាសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក នៅទីក្រុង San Francisco សហរដ្ឋអាមេរិក ក្នុងខែវិច្ឆិកា។ ការយកចិត្តទុកដាក់ ទំនងជាផ្តោតទៅលើថា តើដំណើរទស្សនកិច្ចរបស់សមាជិកព្រឹទ្ធសភានេះ នឹងជួយឲ្យការប្រជុំសម្រេចបានដែរ ឬទេ៕