កោះកុង ៖ អាជ្ញាធរខេត្តកោះកុង ប្រកាសថា ឱសានវាទអប់រំបានផុតហើយ ដោយចាប់ពីថ្ងៃនេះតទៅ នឹងឈប់លើកលែង និងចាំបាច់មានវិធានការទៅលើម្ចាស់សត្វគោក្របី និងពពែដែលចិញ្ចឹមលែងពាសវាលពាសកាលតាមទីសាធារណៈ និងទីប្រជុំជន។

លោក ហាក់ ឡេង អភិបាលរងខេត្តកោះកុង អះអាងនៅរសៀលថ្ងៃទី៣ ខែតុលា ឆ្នាំ២០២៣ថា ឱសានវាទអប់រំណែនាំដល់ម្ចាស់សត្វគោក្របី ពពែ ទូទាំងខេត្តបានផុតហើយ ក្រោយពីចេញសេចក្តីជូនដំណឹងបណ្តាក្រុងស្រុកផ្សព្វផ្សាយជាចុងក្រោយអំពីវិធានការក្តៅគ្មានការលើកលែងទៀតទេចំពោះម្ចាស់សត្វពាហនៈណាមិនគោរពទៅតាមការណែនាំរបស់អាជ្ញាធរ។

លោកអភិបាលរងខេត្តកោះកុង គូសបញ្ជាក់ដែរថា រាល់ការចិញ្ចឹមប្រលែងឱ្យដើរពាសវាលពាលកាលតាមទីសាធារណៈ ឬទីប្រជុំជន វាតែងបង្កគ្រោះថ្នាក់ចរាចរណ៍អ្នកដំណើរតាមផ្លូវ ខ្លះរហូតធ្វើឱ្យមនុស្សក៏មាន ជាពិសេសបាត់បង់សណ្តាប់ធ្នាប់សោភ័ណ្ឌអនាម័យបរិស្ថានតែម្តង។ ដូច្នេះ សូមប្រជាពលរដ្ឋម្ចាស់សត្វទាំងនោះ ត្រូវចិញ្ចឹមដោយដាក់ទ្រុង ឬក្រាលឱ្យបានត្រឹមត្រូវ។

បើតាមលោក ហាក់ ឡេង ស្អែកថ្ងៃទី៤ ខែតុលា នៅរសៀលម៉ោង២ គឺលោកនឹងដឹកនាំប្រជុំជនជាមួយគណៈអភិបាលក្រុងស្រុក និងមន្រ្តីជំនាញពាក់ព័ន្ធ ដើម្បីដាក់ចេញនូវវិធានការអនុវត្តប្រកបដោយប្រសិទ្ធិភាពបំផុត។ កាលពីដើមខែកញ្ញា កន្លងទៅ រដ្ឋវបាលខេត្តកោះកុង ព្រមទាំងបណ្តាក្រុងស្រុកទាំង៧ បានចេញលិខិតព្រមគ្នាជូនដំណឹងដល់ម្ចាស់សត្វគោក្របីក្នុងមូលដ្ឋានត្រូវបញ្ឈប់ការចិញ្ចឹមដោយព្រលែងតាមទីសាធារណៈ ករណីមិនអនុវត្តនឹងរងការផាកពិន័យជាកំហិត។

បញ្ហានេះដែរ លោក សុខ ភិរម្យ អភិបាលស្រុកមណ្ឌលសីមា អះអាងថា លោកបានក្រើនរម្លឹកពលរដ្ឋជា ម្ចាស់សត្វពាហនៈពីវិធានការហាមឃាត់ការប្រលែងសត្វដើរពាសវាលពាលកាលនៅតាមដងផ្លូវសាធារណៈ និងទីប្រជុំជន រួចរាល់ហើយ។

លោកអភិបាលស្រុកមណ្ឌលសីមា លើកឡើងថា បច្ចុប្បន្នបញ្ហាគ្រោះថ្នាក់ចរាចរណ៍បណ្តាលឱ្យមនុស្សស្លាប់បង្កឡើងដោយសារតែសត្វគោ ក្របី កន្លងទៅមានចំនួន២ករណីហើយ ប៉ុន្តែម្ចាស់សត្វចិញ្ចឹមទាំងនោះមិនដែលចេញមុខមកដោះស្រាយសំណងជូនជនរងគ្រោះនោះទេ ដែលជាហេតុនាំឱ្យគ្រួសារជនរងគ្រោះប្តឹងមកអាជ្ញាធរឃុំស្រុក។

រដ្ឋបាលស្រុកមណ្ឌលសីមា ក៏ធ្លាប់បានអប់រំផ្សព្វផ្សាយណែនាំ និងធ្វើកិច្ចសន្យាដល់បងប្អូនប្រជាពលរដ្ឋដែលជាម្ចាស់សត្វចិញ្ចឹមទាំងនោះជាច្រើនលើកច្រើនសាររួចមកហើយ តែនៅតែមានម្ចាស់សត្វចិញ្ចឹមមួយចំនួនតូចនៅតែបន្តលែងសត្វចិញ្ចឹមរបស់ខ្លួនអោយដើរពាលវាលពាលកាលដដែល។ ម្យ៉ាងទៀតសត្វគោ ក្របី ពពែទាំងនោះ បានដើរស៊ីដំណាំដាំដុះរបស់ពលរដ្ឋ និងបានបន្ទោលបង់ដាក់លើផ្លូវធ្វើឱ្យខូចសណ្តាប់ធ្នាប់សោភ័ណ្ឌ បរិស្ថានអនាម័យ ឬអាចបង្កគ្រោះថ្នាក់ផ្សេងៗជាយថាហេតុ៕ ​អត្ថបទ ៖ ឈឹម មករា