រដ្ឋមន្ត្រីការបរទេសកាណាដា លោកស្រី Melanie Joly បាននិយាយកាលពីថ្ងៃអង្គារ (៣ តុលា) ថា ប្រទេសកាណាដាចង់ឱ្យមានកិច្ចពិភាក្សាលក្ខណៈឯកជនជាមួយឥណ្ឌា ដើម្បី​ដោះស្រាយ​ជម្លោះ​ការ​ទូតជុំវិញការសម្លាប់មេដឹកនាំផ្តាច់ខ្លួនសាសនាស៊ីក បន្ទាប់​ពី​មាន​របាយការណ៍​មួយ​បាន​និយាយ​ថា ប្រទេសឥណ្ឌាបានស្នើឱ្យកាណាដាដកអ្នកការទូតចំនួន៤១រូប ចេញពីឥណ្ឌា។

យោងតាមសារព័ត៌មាន FT បានឱ្យដឹងថា ប្រទេសឥណ្ឌាបានប្រាប់ប្រទេសកាណាដាថា ខ្លួន​ត្រូវ​តែ​ធ្វើ​មាតុភូមិនិវត្តន៍អ្នកការទូតទាំងនោះនៅត្រឹមថ្ងៃទី១០ ខែតុលា ខាងមុខនេះ។ ទាំងលោកស្រី Joly និងនាយករដ្ឋមន្ត្រីកាណាដា លោក Justin Trudeau មិនបាន​ឆ្លើយ​តប​នៅ​ពេល​ត្រូវ​សាក​សួរ​ថា តើរបាយការណ៍នោះត្រឹមត្រូវ ឬយ៉ាងណានោះទេ។

ទំនាក់​ទំនងរវាងប្រទេសទាំងពីរ កាន់តែមានភាពតានតឹងខ្លាំងឡើង ជុំវិញការ​សង្ស័យ​របស់​កាណាដា​ដែល​ថា ភ្នាក់ងាររដ្ឋាភិបាលឥណ្ឌាមានទំនាក់ទំនងនឹងឃាតកម្ម កាលពីខែមិថុនា នៅ​ប្រទេស​កាណាដារបស់មេដឹកនាំផ្តាច់ខ្លួនសាសនាស៊ីក និងជាពលរដ្ឋកាណាដា លោក Hardeep Singh Nijjar ដែលឥណ្ឌាបានចាត់ទុកជា «ភេរវករ» ប៉ុន្តែឥណ្ឌា​បាន​ច្រាន​ចោល​ការ​ចោទ​ប្រកាន់​នោះ ដោយនិយាយថាជារឿងមិនសមហេតុផលទាល់តែសោះ៕