ក្រុមមន្ត្រីសន្តិសុខក្នុងតំបន់ និងមេដឹកនាំសហគមន៍បាននិយាយកាលពីថ្ងៃអង្គារ (៣ តុលា) ថា មនុស្សយ៉ាងហោចណាស់ ៣៧នាក់ រួមទាំងស្ត្រីមានផ្ទៃពោះពីរនាក់ ត្រូវ​បាន​ដុត​ស្លាប់​បន្ទាប់​ពី​ការ​ផ្ទុះ​នៅ​ឯរោងចក្រចម្រាញ់ប្រេងខុសច្បាប់មួយកន្លែង នៅភាគខាងត្បូងប្រទេសនីហ្ស៊េរីយ៉ា។

ការ​ចម្រាញ់ប្រេងខុសច្បាប់ គឺជារឿងធម្មតាទៅហើយនៅក្នុងតំបន់ដីសណ្ដនីហ្ស៊េ ដែល​សម្បូរ​ប្រេង​ដោយ​របស់ប្រទេសនីហ្ស៊េរីយ៉ា ខណៈដែលអ្នកស្រុកក្រីក្របានប្រើប្រាស់បំពង់បង្ហូរប្រេង ដើម្បី​ធ្វើ​ប្រេងលក់ និងទទួលបានប្រាក់ចំណេញដើម្បីចិញ្ចឹមជីវិត។

ការអនុវត្ត​បែប​នោះ ដែលអាចកើត​មាន​ជា​មូលដ្ឋាន​ដូច​ជា​ការ​ស្ងោរ​ប្រេង​ឆៅ​ក្នុង​ស្គរ​ ដើម្បី​ចម្រាញ់​យក​ប្រេង​ឥន្ធនៈ ច្រើនតែបង្កជាហានិភ័យដល់ស្លាប់។

លោក Rufus Welekem ប្រធានសន្តិសុខក្នុងសហគមន៍បាននិយាយថា ឧបទ្ទវហេតុ​ចុង​ក្រោយ​បំផុត​នេះ បានកើតឡើងកាលពីព្រឹកថ្ងៃចន្ទ (២ តុលា) នៅក្នុងសហគមន៍ Ibaa ក្នុងរដ្ឋ Rivers ។

ក្រុមបរិស្ថានក្នុងតំបន់បាននិយាយថា ប្រទេសនីហ្ស៊េរីយ៉ាបានព្យាយាមអស់ជាច្រើនឆ្នាំ ដើម្បី​ទប់​ស្កាត់​ការ​ចម្រាញ់ប្រេងឆៅខុសច្បាប់ ប៉ុន្តែទទួលបានជោគជ័យតិចតួចណាស់ ព្រោះ​តែ​មួយ​ផ្នែក​ដោយសារ​អ្នក​ដែលមានទំនាក់ទំនងជាមួយអ្នកនយោបាយមានឥទ្ធិភល និងក្រុមមន្ត្រីសន្តិសុខ មាន​ជាប់ពាក់ព័ន្ធក្នុងករណីការចម្រាញ់ប្រេងឆៅខុសច្បាប់ទាំងនោះដែរ៕