បុគ្គលិកសង្គ្រោះបន្ទាន់ បានធ្វើការនៅជុំវិញគំនរបាក់បែករថយន្តក្រុង បន្ទាប់ពីរថយន្តក្រុងទីក្រុង ដឹក​ភ្ញៀវទេសចរទៅកាន់ទីតាំងបោះជំរំ បានធ្លាក់ចេញពីស្ពាននៅជិតទីក្រុង Venice នៅ​ប្រទេស​អ៊ីតាលី​ភាគខាងជើង បណ្តាលឲ្យមនុស្សយ៉ាងហោចណាស់២០នាក់ស្លាប់។ រថយន្តក្រុង​បាន​រេ​ចង្កូត​ចេញ​ពីផ្លូវ ហើយបានធ្លាក់នៅជិតខ្សែរថភ្លើង នៅក្នុងស្រុក Mestre ដែលតភ្ជាប់ទៅ​កាន់​ទី​ក្រុង​ Venice ដោយស្ពានមួយនេះ។ មូលហេតុនៃឧបទ្ទវហេតុនេះនៅពុំទាន់ដឹងច្បាស់នៅឡើយ។

​ទូរទស្សន៍ប្រទេសអ៊ីតាលី Sky បានរាយការណ៍ថាសាកសព១៨នាក់ ត្រូវ​បាន​ទាញ​យក​រហូត​មក​ដល់​ពេល​នេះ​ពីគំនរបាក់បែក បន្ទាប់ពីយាន​យន្ត​បាន​ធ្លាក់​ចម្ងាយ​១៥​ម៉ែត្រ​ទៅ​លើ​បណ្តាញ​អគ្គិសនី​ និងបានឆេះ នៅម៉ោងប្រហែល ៧:៤៥នាទីល្ងាចម៉ោងក្នុងតំបន់។

លោក Luigi Brugnaro អភិបាលក្រុង Venice បានសរសេរបង្ហោះលើបណ្តាញX (ពី​មុនTwitter)​ថា វាជាហេតុការណ៍ដ៍មហន្តរាយ។ ខ្ញុំនិយាយពីហេតុការណ៍នេះមិនចេញនោះទេ។ ក្រោយ​មកលោកបាននិយាយទៅកាន់ បណ្តាញទូរទស្សន៍រដ្ឋអ៊ីតាលី Rai News24 ថា មាន​មនុស្ស​យ៉ាងហោចណាស់ ២០នាក់ស្លាប់ ប៉ុន្តែមនុស្សមួយចំនួននៅជាប់ក្នុងគំនរបាក់បែក។

ទីភ្នាក់ងារព័ត៌មានអ៊ីតាលី ANSA បានរាយការណ៍ថា មានអ្នកស្លាប់២១នាក់ និង១២នាក់រងរបួស ហើយ​៤ ឬ៥នាក់នៅបាត់ខ្លួននៅឡើយ។ ទោះជាយ៉ាងណាប្រតិបត្តិការសង្គ្រោះនៅតែបន្ត ហើយ​ទី​ភ្នាក់ងារ​សារព័ត៌មានជាច្រើន និយាយថាចំនួនអ្នកស្លាប់ អាចកើនឡើងច្រើនជាងនេះ៕