សហភាពអឺរ៉ុប បានសន្យាផ្តល់ជំនួយ ដែលមានតម្លៃ ៦៥០លានអឺរ៉ូ ដល់ប្រទេសអេត្យូពី ជិត៣ឆ្នាំ បន្ទាប់ពីខ្លួនបានកាត់បន្ថយជំនួយផ្ទាល់ដល់ប្រទេសអាហ្វ្រិកខាងកើតជុំវិញអំពើឃោរឃៅដែលបាន​ប្រព្រឹត្តនៅក្នុងសង្គ្រាមស៊ីវិលដ៏បង្ហូរឈាមនេះ។

លោកស្រី ជូតា អឺពីឡៃណិន (Jutta Urpilainen) ស្នងការ​សហភាព​អឺរ៉ុប​ សម្រាប់​ភាពជា​ដៃគូ​អន្តរជាតិ​បាន​ប្រកាសកិច្ចព្រមព្រៀងនេះ ក្នុងអំឡុងពេល​សន្និសីទ​កាសែត​មួយ​ជាមួយ​រដ្ឋ​មន្ត្រី​ហិរញ្ញ​វត្ថុ​អេត្យូពី លោក អាម៉េដ ស៊ីដេ (Ahmed Side) នៅរដ្ឋធានីអាឌីស អាបេបា (Addis Ababa) កាលពីថ្ងៃអង្គារ។

លោកស្រី អឺពីឡៃណិន បាននិយាយថា៖​ «វាដល់​ពេល​ត្រូវ​ធ្វើ​ប្រក្រតី​ភាព​ទំនាក់​ទំនង​បណ្តើរៗ​ហើយ​ និងកសាងឡើងវិញនូវភាពជាដៃគូពង្រឹងគ្នាទៅវិញទៅមកជាមួយប្រទេសរបស់អ្នក» ដោយ​ពណ៌នាអំពីកញ្ចប់ជំនួយថាជា «ជំហានជាក់ស្តែងដំបូង» ក្នុងដំណើរការនេះ បន្ទាប់​ពី​បទ​ឈប់​បាញ់​បានបញ្ចប់សង្គ្រាម កាលពីខែវិច្ឆិកា ឆ្នាំមុន។

កញ្ចប់​​ជំនួយរបស់សហភាពអឺរ៉ុបដំបូងមានតម្លៃមួយពាន់លានអឺរ៉ូ (១,០៤ ពាន់លានដុល្លារ) ហើយ​គ្រោងនឹងផ្តល់ឲ្យអេត្យូពីពីឆ្នាំ ២០២១ ដល់ឆ្នាំ ២០២៧ ប៉ុន្តែវាត្រូវបានផ្អាកនៅចុងឆ្នាំ ២០២០ បន្ទាប់ពីការប្រយុទ្ធគ្នាបានផ្ទុះឡើងនៅក្នុងតំបន់ទីហ្រ្គេភាគខាងជើង។ សហរដ្ឋអាមេរិក ក៏​បានបញ្ឈប់ផ្តល់ជំនួយ និងច្បាប់សម្រាប់ការដាក់ទណ្ឌកម្មផងដែរ៕