ស្វីស ៖ ធនាគារអភិវឌ្ឍន៍ជាតិប្រេស៊ីល (BNDES) ដែលគ្រប់គ្រងមូលនិធិ បាននិយាយកាលពីថ្ងៃអង្គារថា ប្រទេសស្វីស និងសហរដ្ឋអាមេរិក បានបរិច្ចាគប្រាក់ចំនួន៨,៤ លានដុល្លារ ដល់មូលនិធិ Amazon របស់ប្រទេសប្រេស៊ីល ដើម្បីជួយបញ្ឈប់ការកាប់បំផ្លាញព្រៃឈើ និងអភិរក្សព្រៃត្រូពិចដ៏ធំបំផុតរបស់ពិភពលោកនេះ។

ធនាគារនេះ បាននិយាយនៅក្នុងសេចក្តីថ្លែងការណ៍មួយថា ប្រទេសស្វីស បានបរិច្ចាគប្រាក់ចំនួន ៥ លានហ្វ្រង់ស្វីស (៥,៤លានដុល្លារ) និងសហរដ្ឋអាមេរិកចំនួន ៣លានដុល្លារ។

ជំនួយរបស់សហរដ្ឋអាមេរិក គឺជាផ្នែកមួយនៃការបរិច្ចាគចំនួន៥០០លានដុល្លារក្នុងរយៈពេល ៥ ឆ្នាំដែលបានប្រកាស ដោយលោកប្រធានាធិបតី ចូ បៃដិន កាលពីខែមេសា នៅឯកិច្ចប្រជុំអាកាសធាតុ ដែលលោកប្រធានាធិបតី ល្វីស អ៊ីណាស៊ីអូ លូណា ដា ស៊ីលវ៉ា (Luiz Inacio Lula da Silva) បានសន្យាម្តងហើយម្តងទៀតរបស់ប្រេស៊ីល ក្នុងសម្រេចបាននូវការឈប់កាប់បំផ្លាញព្រៃឈើដល់កម្រិតសូន្យ នៅឆ្នាំ២០៣០។

នាយកផ្នែកសង្គម-បរិស្ថានរបស់ធនាគារ Tereza Campello បាននិយាយថា៖«ការរួមចំណែកទាំងនេះពង្រឹងការប្តេជ្ញាចិត្ត និងទំនុកចិត្តរបស់ប្រទេសទាំងនេះ នៅក្នុងរបៀបវារៈបរិស្ថានរបស់ប្រទេសប្រេស៊ីល និងសកម្មភាពរបស់មូលនិធិAmazon នៅក្នុងតំបន់»។