​បាល់ទាត់៖ ​ក្រុម​តោ​ខៀវ Chelsea ដែល​ទើប​ឈ្នះ​ជើងឯក UEFA Champions League ថ្មីៗ​នេះ​ត្រូវ​បាន​គេ​ដឹង​ថា គ្រោង​បញ្ចេញ​កីឡាករ ១០​នាក់​នៅ​រដូវ​ក្តៅ​ខាងមុខនេះ​។ ​Chelsea មិន​បង្អង់​យូរ​ឡើយ​ ក្នុង​ការរៀបចំ​កីឡាករ​ត្រៀម​រដូវ​កាល​ថ្មី​ខាងមុខ ខណៈ​គម្រោង​បញ្ចេញ​កីឡា​ករ​ទាំង ១០នាក់​នេះ​គឺ​ដើម្បី​ការ​នាំចូល​កីឡាករ​ថ្មី​មក​ពង្រឹង​ក្លិប​។

​​ខ្សែប្រយុទ្ធ​បារាំង Olivier Giroud នឹង​ជា​មនុស្ស​ទី១ ដែល​នឹង​ចាកចេញ​ដោយ​កិច្ចសន្យា​របស់​គេ​ នឹង​អស់​សុពលភាព​នៅ​ខែ​ដំណាច់​ខែ​មិថុនា​នេះ ខណៈ Fikayo Tomori នឹង​ចុះហត្ថលេខា​ទិញ​ផ្តាច់​ពី AC Milan នៅ​ពេល​ខាងមុខនេះ​។​ ​Tammy Abraham និង Kurt Zuma ក៏​ស្ថិត​ក្នុង​បញ្ជី​លក់​ចេញ​ដែរ​ ដោយ​អ្នក​ទាំងពីរ​មិន​ស្ថិត​ក្នុង​ជំរើស​របស់ Thomas Tuchel​។ ​​កីឡាករ​ផ្សេងទៀត​ដែល​ស្ថិត​ក្នុង​បញ្ជី​ខ្ចី​រដូវ​កាល​កន្លងទៅ​ សុទ្ធតែ​ប្រឈម​លក់​ចេញ​ដូចជា Davide Zappacosta, Ross Barkley, Tiemoue Bakayoko, Danny Drinkwater និង Michy Batshuayi រួម​ជាមួយ Emerson ផង​ដែរ​។

គេ​មិនទាន់​ដឹង​ថា Chelsea នឹង​ចំណាយ​លុយ​ប៉ុន្មាន​នៅឡើយទេ​ ក្នុង​ការ​នាំចូល​កីឡាករ​ថ្មី​នៅ​ពេល​ខាងមុខ​ ខណៈ​បញ្ជី​កីឡាករ​ស្ថិត​ក្នុង​គោលដៅ​មាន​ដូច​ជា Romelu Lukaku, Erling Haaland, Harry Kane, Archraf Hakimi និង Niklas Sule ជាដើម​៕

​អត្ថបទ​៖​នាង សុភា​វុ​ធ