កាណាដា ៖ ប្រទេសកាណាដាបានបោះឆ្នោតជ្រើសរើសសមាជិកសភាសេរីនិយម លោក Greg Fergus ឲ្យធ្វើជាប្រធានសភាថ្មី បន្ទាប់ពីអ្នកមុនបានលាលែងពីតំណែង ស្របពេលមានជម្លោះក្នុងសភា។ 

លោក Fergus ជាបុរសស្បែកខ្មៅដំបូងគេដែលកាន់តំណែងប្រធានសភានេះ ត្រូវបានជ្រើសរើសដោយសមាជិកសភាចំនួន៣៣៨រូប បន្ទាប់ពីការបោះឆ្នោតសម្ងាត់កាលពីថ្ងៃអង្គារ (៣ តុលា)។

គួររម្លឹកផងដែរថា អតីតប្រធានសភាកាណាដា លោក Anthony Rota បានលាលែងពីតំណែង បន្ទាប់ពីបានអញ្ជើញបុរសជនជាតិអ៊ុយក្រែនម្នាក់ ដែលប្រយុទ្ធដើម្បីអង្គភាពណាស៊ី ទៅកាន់សភា។ លោក Rota បាននិយាយថា លោកមិនបានដឹងពីទំនាក់ទំនងរបស់អតីតយុទ្ធជនរូបនោះ ជាមួយក្រុមណាស៊ីនោះទេ។ 

នៅក្នុងសុន្ទរកថាដំបូងរបស់លោក Fergus ប្រធានសភាថ្មីរូបនេះបានជំរុញឱ្យសហការីរបស់លោក សម្ដែងការគោរពចំពោះគ្នាទៅវិញទៅមកនៅក្នុងសភា ជាទីដែលលោកបាននិយាយថា គឺសម្រាប់ «ការជជែកដេញដោល»។

នាយករដ្ឋមន្ត្រីកាណាដា លោក Justin Trudeau បាននិយាយថា ការជាប់ឆ្នោតរបស់លោក Fergus «គួរតែជាការបំផុសគំនិតសម្រាប់ប្រជាជនកាណាដាទាំងអស់ ជាពិសេសក្មេងជំនាន់ក្រោយ ដែលចង់ចូលរួមក្នុងនយោបាយ»៕