តៃវ៉ាន់ ៖ ព្យុះទីហ្វុង Koinu បានបោកបក់ឆ្ពោះទៅភាគខាងត្បូងកោះតៃវ៉ាន់ នៅថ្ងៃពុធ (ទី៤ ខែតុលា) នេះ ដោយនាំមកនូវភ្លៀងធ្លាក់ និងខ្យល់បក់បោកខ្លាំង ហើយជំរុញឲ្យមានការលុបចោលជើងហោះហើរ ក្នុងស្រុកចំនួន ៧០ជើង និងការផ្អាកការងារ និងសាលារៀននានា ក្នុងតំបន់ទីក្រុង នៅភាគខាងត្បូងនៃកោះនេះចាប់ពីពេលល្ងាចថ្ងៃនេះ។

បើយោងតាមប្រភពតាមដានហានិភ័យនៃព្យុះត្រូពិច (Tropical Storm Risk) បានឲ្យដឹងថា ព្យុះ Koinu ត្រូវបានរំពឹងថា នឹងបោកបក់ទៅដល់ដីគោក នៅឆ្នេរសមុទ្រភាគអាគ្នេយ៍របស់កោះតៃវ៉ាន់ ក្បែរទីក្រុង Taitung នាព្រឹកថ្ងៃព្រហស្បតិ៍ (ទី៥ ខែតុលា) ក្នុងនាមជាព្យុះទីហ្វុងប្រភេទទី៣ ប៉ុន្តែបន្ទាប់មក ថមថយឥទ្ធិពល ខណៈដែលព្យុះនេះឆ្លងកាត់ចុងភាគខាងត្បូងរបស់កោះ ហើយចូលទៅច្រកសមុទ្រតៃវ៉ាន់។

បន្ទាប់ពីឆ្លងកាត់កោះតៃវ៉ាន់ ព្យុះទីហ្វុងនេះនឹងបក់បោកឆ្ពោះទៅខេត្ត Guangdong និង Fujian របស់ប្រទេសចិន ហើយបន្ទាប់មកទៅកាន់ទីក្រុងហុងកុង ជាកន្លែងដែលព្យុះនេះទំនងជានឹងចុះខ្សោយឥទ្ធិពលបន្ថែមទៀត ហើយក្លាយជាព្យុះត្រូពិច៕