ភ្នំពេញ ៖អនុប្រធានទី២ គណៈកម្មាធិការជាតិគ្រប់គ្រងគ្រោះមហន្តរាយ ជំរុញដល់ភាគីពាក់ព័ន្ធយកចិត្តទុកដាក់ឱ្យបានសកម្ម និងខ្លាំងក្លាក្នុងការបំពេញកាតព្វកិច្ច លើការងារគ្រប់គ្រងគ្រោះមហន្តរាយ តាមរយៈការកាត់បន្ថយហានិភ័យគ្រោះមហន្តរាយឱ្យបានថយចុះក្នុងកម្រិតអប្បបរមា ទោះបីគ្រោះមហន្តរាយបង្កឡើងដោយមនុស្សក្តី ឬដោយធម្មជាតិក្តី និងត្រូវចាត់ទុកការងារគ្រប់គ្រងគ្រោះមហន្តរាយជាការងារសមម្រាប់ទាំងអស់គ្នា។

​ការអំពាវនាវបែបនេះ នៅពេលអញ្ជើញបើកសិក្ខាសាលាពិគ្រោះយោបល់ថ្នាក់ជាតិ «ស្តីពីការប្រកាសព័ត៌មានឱ្យដឹង មុនសម្រាប់ទាំងអស់គ្នានៅកម្ពុជា (EW4ALL)» ដែលរៀបចំឡើងក្រោមកិច្ចសហប្រតិបត្តិការរៀបចំដោយគណៈកម្មាធិការជាតិគ្រប់គ្រងគ្រោះមហន្តរាយ ការិយាល័យអ្នកសម្របសម្រួលរបស់អង្គការសហប្រជាជាតិ កម្មវិធីស្បៀង អាហារពិភពលោក និងមានការគាំទ្រដោយដៃគូអភិវឌ្ឍន៍ជាច្រើនទៀត នៅសណ្ឋាគារសូហ្វីតែលភ្នំពេញ ភូគាត្រា នាថ្ងៃទី ៤ ខែតុលា ឆ្នាំ ២០២៣នេះ។

 ឯកឧត្តម ហង្ស សាមឿន អនុប្រធានទី២ គណៈកម្មាធិការជាតិគ្រប់គ្រងគ្រោះមហន្តរាយមានប្រសាសន៍ថា រាជរដ្ឋាភិបាលកម្ពុជាកំពុងដើរតួនាទីយ៉ាងសំខាន់ក្នុងការជំរុញសកម្មភាពលើការប្រកាសព័ត៌មានឱ្យដឹងមុនសម្រាប់ប្រជាពលរដ្ឋ និងការប្រកាន់យកនូវវិធីសាស្រ្ត «សង្គមទាំងមូល» ដែលពាក់ព័ន្ធនឹងភាគីទាំងអស់ រួមទាំងសង្គមស៊ីវិល និងវិស័យឯកជន ដែលអាចពង្រឹងនិងនិរន្តរភាពសេវាកម្មប្រកាសព័ត៌មានឱ្យដឹងមុនបានប្រសើរជាងមុន។ 

លោក ចូ សូយ័រ (Jo Scheuer) អ្នកសម្របសម្រួលអង្គការសហប្រជាជាតិប្រចាំនៅកម្ពុជា បានបង្ហាញពីការប្តេជ្ញាចិត្តក្នុងការដោះស្រាយបញ្ហាសំខាន់នៃប្រព័ន្ធព្រមានជាមុននៅកម្ពុជា និងនាំមកនូវសន្ទុះរួមគ្នាអនុវត្តការងារក្នុងការការពារជីវិត និងជីវភាពរស់នៅរបស់ប្រជាជនកម្ពុជាពី ផលប៉ះពាល់នៃការប្រែប្រួលអាកាសធាតុ និងហានិភ័យផ្សេងៗទៀត។

សូមជម្រាបថាប្រពន្ធ័ប្រកាសព័ត៌មានឱ្យដឹងមុន ត្រូវបានចាត់ទុកជាយន្តការដ៏មានប្រសិទ្ធភាពក្នុងការចូល រួមចំណែកដល់ការកាត់បន្ថយហានិភ័យគ្រោះមហន្តរាយ ការបន្សុំាទៅនឹងការប្រែប្រួលអាកាសធាតុ និងជួយសង្គ្រោះអាយុជីវិតមនុស្ស និងសេដ្ឋកិច្ចជាតិដែលផ្តល់ផលចំណេញដល់ការវិនិយោគ។ ប្រជាពលរដ្ឋកម្ពុជាក៏អាចបានសារជាដំណឹងជាមុនឬប្រជាពលរដ្ឋក៏អាចផ្តល់ជាដំណឹង ដល់ស្ថាប័នបានដឹងពីបញ្ហាគ្រោះមហន្តរាយដើម្បីជួយសង្គ្រោះបានទាន់ពេលតាមរយៈប្រពន្ធ័ទំនាក់ទំនងដោយមិនគិតថ្លៃសេវា ២៤ម៉ោង គឺលេខ១២៩៤ ផងដែរ៕

អត្ថបទ ៖ ភារម្យ