ភ្នំពេញ ៖ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអំពាវនាវទៅ ដល់អាជ្ញាធរខេត្ត ឬសមត្ថកិច្ចប្រចាំការនៅតាមព្រំដែន ជាប់នឹងប្រទេសជិតខាងទាំងអស់ ត្រូវពិនិត្យឱ្យ បានទ្វេដង ឬឱ្យបានម៉តចត់ ចំពោះករណីមាននារីក្មេងៗក្រោម១៨ឆ្នាំឆ្លងដែន ដោយគ្មានមាតាបិតា ឬអាណាព្យាបាលទៅជាមួយ ដើម្បីចៀសវាងមានអំពើជួញដូរ។​

ក្នុងពិធីបិទវគ្គសុក្រឹតការថ្នាក់ដឹកនាំនគរបាលកម្រិត២ ជំនាន់ទី៤ និងវគ្គបណ្តុះបណ្តាលកម្រិតបឋមវិ ជ្ជាជីវៈនគរបាល ជំនាន់ទី១៧ លើកទី២ នៅថ្ងៃទី៤ ខែតុលា ឆ្នាំ២០២៣ នៅបណ្ឌិត្យសភានគរបាលកម្ពុជា ឯកឧត្តមអភិសន្តិបណ្ឌិត បានមានប្រសាសន៍ថា ក្នុងរយៈពេលប៉ុន្មានថ្ងៃកន្លងមកនេះ មានករណីចាញ់បោកមេខ្យល់ និងត្រូវរំដោះបានចំនួន៧នាក់នៅប្រទេសឡាវ ក្នុងនោះ ២នាក់រស់នៅខេត្តសៀម រាប និងបានមកដល់កម្ពុជាវិញហើយ ខណៈ ៥ នាក់ទៀតកំពុងរៀបចំឯកសារបញ្ជូនមកវិញ។

ឯកឧត្តមបន្តថា ពាក់ព័ន្ធនឹងបញ្ហានេះ សូមអាជ្ញាធរខេត្តដែលមានព្រំប្រទល់ជាប់នឹងប្រទេសឡាវ ថៃ និងវៀតណាម តាមដានលើករណីបើមានការនាំនារីក្រោមអាយុ១៨ឆ្នាំ ដែលមិនមានអាណាព្យាបាលទៅជាមួយ ត្រូវពិនិត្យឱ្យបានទ្វេដង ពិសេសគ្រប់គ្រងអត្តសញ្ញាណឱ្យបានច្បាស់ ចំពោះអ្នកដែលដឹក នាំពួកគេឆ្លងដែន។

ក្រៅពីលើកឡើងបែបនេះ ឯកឧត្តមអភិសន្តិបណ្ឌិត ស សុខា ក៏បានអំពាវនាវដល់អាជ្ញាធរខេត្តទាំងអ ស់ ត្រូវផ្សព្វផ្សាយអំពីបញ្ហានេះឱ្យបានទូលំទូលាយ ជាពិសេសឱ្យបានទៅដល់ជនដែលងាយរងគ្រោះ ៕​ អត្ថបទ ៖ បាន សុខរិទ្ធិ