ប្រទេសចិនបានសម្តែងការមិនពេញចិត្ត នៅថ្ងៃពុធ (ទី៤ ខែតុលា) នេះ ចំពោះការទាមទាររបស់សហភាពអឺរ៉ុប (EU) ដើម្បីឲ្យចូលរួមក្នុងរយៈពេល «ដ៏ខ្លី» ក្នុងការពិគ្រោះយោបល់លើការស៊ើបអង្កេតរបស់ប្លុកនេះពាក់ព័ន្ធនឹងការឧបត្ថម្ភធន សម្រាប់រថយន្តអគ្គិសនី (EV)។

ការលើកឡើងនេះបានកើតមាន នៅពេលដែលគណៈកម្មការអឺរ៉ុបបានចាប់ផ្តើមបើកការស៊ើបអង្កេតផ្លូវការថា តើត្រូវកំណត់ពន្ធ ដើម្បីការពារដល់អ្នកផលិតរបស់ខ្លួនពី «លំហូរ» នៃការនាំចូលរថយន្តអគ្គិសនី (EV) តម្លៃទាបរបស់ចិន ដែលខ្លួននិយាយថា ទទួលបានអត្ថប្រយោជន៍ពីការឧបត្ថម្ភធនរបស់រដ្ឋ។

តែក្រសួងពាណិជ្ជកម្មរបស់ប្រទេសចិន បានឲ្យដឹងនៅក្នុងសេចក្តីថ្លែងការណ៍ថា ប្រទេសចិន «មិនពេញចិត្តយ៉ាងខ្លាំង» ចំពោះការស៊ើបអង្កេតប្រឆាំងនឹងការឧបត្ថម្ភធន ដោយសារប្លុកនេះមិនមានភ័ស្តុតាងគ្រប់គ្រាន់ និងមិនអនុលោមតាមច្បាប់របស់អង្គការពាណិជ្ជកម្មពិភពលោក។

ក្រសួងបានបន្ថែមថា ភាគីចិនមិនទទួលបានឯកសារពិគ្រោះយោបល់គ្រប់គ្រាន់នោះឡើយ ហើយនឹងតាមដានយ៉ាងយកចិត្តទុកដាក់លើនីតិវិធីស៊ើបអង្កេតរបស់គណៈកម្មការ ដើម្បីការពារសិទ្ធិ និងផលប្រយោជន៍របស់ក្រុមហ៊ុនខ្លួន។

ការចាប់ផ្តើមនូវការស៊ើបអង្កេតផ្លូវការរបស់សហភាពអឺរ៉ុប បានកើតឡើងជាមួយនឹងការប្រកាស នៅក្នុងទិនានុប្បវត្តិផ្លូវការរបស់ប្លុកនេះ ដែលបាននិយាយថា ប្រទេសចិនត្រូវបានអញ្ជើញឲ្យធ្វើការពិគ្រោះយោបល់ ទោះបីជាខ្លួនមិនបានផ្តល់ពេលវេលាជាក់លាក់ក៏ដោយ។ សហភាពអឺរ៉ុប បានបន្ថែមថា ព័ត៌មានដែលប្រមូលបានដោយគណៈកម្មាការមានទំនោរបង្ហាញថា អ្នកផលិតនៅក្នុងប្រទេសចិនទទួលបានអត្ថប្រយោជន៍ពីការឧបត្ថម្ភធន ដែលធ្វើឲ្យខូចឃាតដល់ឧស្សាហកម្មរបសសហភាពអឺរ៉ុប៕