ប្រជាពលរដ្ឋហៃទី ដែលបោះទីជម្រកក្នុងជំរំជនភៀសខ្លួនសម្រាប់ជនរងគ្រោះដោយសារសង្រ្គាមឧក្រិដ្ឋកម្ម កាលពីថ្ងៃអង្គារ យល់ព្រមទទួលយកបេសកកម្មសន្តិសុខបរទេសគាំទ្រដោយអង្គការសហប្រជាជាតិ ដើម្បីធ្វើសង្រ្គាមជាមួយក្រុមឧក្រិដ្ឋជនហិង្សា បើសិនជាវានឹងធ្វើឲ្យសន្តិសុខល្អប្រសើរឡើងនៅក្នុងប្រទេសនៅតំបន់ការ៉ាអ៊ីបមួយនេះ ។

 កាលពីថ្ងៃចន្ទកន្លងទៅ ក្រុមប្រឹក្សាសន្តិសុខអង្គការសហប្រជាជាតិ បានអនុញ្ញាតឲ្យមានបេសកកម្មសន្តិសុខបរទេសនៅប្រទេសហៃទី រយៈពេល ១ឆ្នាំ ក្រោយពេលពួកគេស្នើសុំជំនួយប្រយុទ្ធជាមួយក្រុមឧក្រិដ្ឋជនហិង្សា ដែលបានគ្រប់គ្រងតំបន់ភាគច្រើននៅក្នុងរដ្ឋធានី ព័រ អូប្រាំង ។

ប្រជាពលរដ្ឋហៃទីស្នាក់នៅក្នុងមហោស្រពភាពយន្ត Rex និងសាលាជាតិ Colbert Lochard ដែលត្រូវបានប្រើប្រាស់ជាជំរំជនភៀសខ្លួនសម្រាប់មនុស្សរត់ភៀសខ្លួនចេញពីអំពើហិង្សាក្រុមឧក្រិដ្ឋជន យល់ព្រមទទួលយកការធ្វើអន្តរាគមន៍របស់អន្តរជាតិនៅលើទឹកដីរបស់ពួកគេ ។

គួរឲ្យដឹងថា ប្រជាពលរដ្ឋហៃទី មានការប្រុងប្រយ័ត្នខ្ពស់ចំពោះវត្តមានប្រដាប់អាវុធរបស់អង្គការសហប្រជាជាតិ ។ ប្រទេសហៃទីលែងមានជំងឺអាសន្នរោគ រហូតដល់ឆ្នាំ ២០១០ ពេលដែលក្រុមអ្នកថែរក្សាសន្តិភាពអង្គការសហប្រជាជាតិ បញ្ចេញទឹកស្អុយមានផ្ទុកមេរោគ ចូលទៅក្នុងទន្លេ ។ មនុស្សជាង ៩ពាន់នាក់ បានស្លាប់ ដោយសារជំងឺមួយនេះ ហើយមនុស្សប្រហែល ៨០ម៉ឺននាក់ទៀត ធ្លាក់ខ្លួនឈឺ ។

ប៉ុន្តែបេសកកម្មជំនួយសន្តិសុខ ស្របពេលដែលអនុម័តដោយក្រុមប្រឹក្សាសន្តិសុខអង្គការសហប្រជាជាតិ មិនមែនជាប្រតិបត្តិការរបស់អង្គការសហប្រជាជាតិនោះទេ ។ 

កាលពីខែកក្កដាកន្លងទៅ ប្រទេសកេនយ៉ា បានសន្យាបញ្ជូនកងកម្លាំងនគរបាល ១ពាន់នាក់ដល់ប្រទេសហៃទី បន្ទាប់មកប្រទេសបាហាម៉ាស់ ប្តេជ្ញាផ្តល់ជំនួយទាហាន ១៥០នាក់ ស្របពេលដែលប្រទេសចាម៉ៃកា ហើយប្រទេសកោះ អង់ទីហ្គា និងបាប៊ុយដា ចង់ជួយពួកគេផងដែរ ៕