ប្រជាពលរដ្ឋរស់នៅក្នុងទីក្រុងញូវយ៉ក សហរដ្ឋអាមេរិក សង្ឃឹមថាពួកគេនឹងក្លាយជាអ្នកមាន ពេលដែលពួកគេតម្រង់ជួរចូលទិញសំបុត្រឆ្នោត សម្រាប់ការចាប់ឆ្នោតផ្សងលេខធំរបស់ឆ្នោតសំណាង Powerball ដើម្បីឈ្នះរង្វាន់ទឹកប្រាក់ចំនួន ១,២ពាន់លានដុល្លារ ។

អ្នកស្រី Electra Zogan ដែលបានទិញសំបុត្រឆ្នោតផ្សងសំណាង Powerball និយាយថា អ្នកនឹងឆ្ងួតបើមិនលេងវាទេនោះ ។

អ្នកស្រី Zogan និយាយថា អ្នកស្ថិតនៅក្នុងចំណោមមនុស្សដែលនឹងឈ្នះវា ។ បើសិនជាខ្ញុំឈ្នះ ខ្ញុំនឹងក្លាយជាអ្នកមាន ខ្ញុំនឹងមានផ្ទះដែលខ្ញុំចង់បាន ខ្ញុំនឹងដើរលេង ហើយខ្ញុំនឹងអាចគិតពីអ្វីផ្សេងទៀតដែលខ្ញុំត្រូវធ្វើ ។

អ្នកស្រីបន្តថា ខ្ញុំមានគ្រួសារ ខ្ញុំមានកូនស្រី២នាក់ និងចៅស្រីច្រើននាក់ ហើយខ្ញុំនឹងមើលថែពួកគេផងដែរ ។

ការចាប់ឆ្នោតបន្ទាប់នឹងធ្វើឡើងនៅថ្ងៃពុធ នៅសហរដ្ឋអាមេរិក ត្រូវនឹងថ្ងៃព្រហស្បតិ៍នៅកម្ពុជា សម្រាប់លេខធំ ឈ្នះទឹកប្រាក់ចំនួន ១,២ពាន់លានដុល្លារ ។

សារព័ត៌មានសហរដ្ឋអាមេរិក បានរាយការណ៍ថា នៅមិនទាន់មានអ្នកឈ្នះនោះទេពីការចាប់ឆ្នោតសម្រាប់លេខធំ ចាប់តាំងពីថ្ងៃទី ១៩ ខែកក្កដារហូតមក ។ 

យោងតាមការគេហទំព័រផ្លូវការរបស់ឆ្នោតផ្សងសំណាង Powerball បានឲ្យដឹងថា អ្នកឈ្នះរង្វាន់លេខធំ គឺជាមនុស្សម្នាក់ស្ថិតនៅក្នុងចំណោមមនុស្ស ២៩២,២លាននាក់ ៕