ភ្នំពេញ:ជ័យលាភីលេខ០១ ក្នុងមហោស្រពចាប៉ីដងវែងទូទាំងប្រទេសឆ្នាំ២០២៣ ក្រោមប្រធានបទ «វប្បធម៌សន្តិភាព» បានទៅបេក្ខជន ណូន សុខ មកពីខេត្តសៀមរាប, ជ័យលាភីលេខ០២ បានទៅបេក្ខជន សាត វណ្ណា មកពីរាជធានីភ្នំពេញ និងជ័យលាភីលេខ០៣ បានទៅបេក្ខជន សូរ សារ៉ន មកពីខេត្តស្វាយរៀង។

លោក ឈាង ឆដាភ័ក្ត្រ ប្រធាននាយកដ្ឋានសិល្បៈទស្សនីយភាព បានឲ្យដឹងក្នុងពិធីបិទមហោស្រពចាប៉ីដងវែងទូទាំងប្រទេសឆ្នាំ២០២៣ ក្រោមប្រធានបទ «វប្បធម៌សន្តិភាព» នាល្ងាចថ្ងៃទី៤ ខែតុលា ឆ្នាំ២០២៣នេះថា មហោស្រពចាប៉ីដងវែងទាំងប្រទេស ឆ្នាំ២០២៣ ប្រារព្ធឡើងមានរយៈពេល៣ថ្ងៃ ចាប់ពីថ្ងៃទី២-៤ ខែតុលា ស្របពេលដែលទម្រង់សិល្បៈចាប៉ីដងវែង និងទម្រង់សិល្បៈ បុរាណ ខ្មែរផ្សេងៗទៀត កំពុងថមថយ នៃការគាំទ្រពីមហាជនគ្រប់ស្រទាប់ថ្នាក់ នាសម័យសកលភាវូបនីយកម្ម។ គោលបំណងសំខាន់ នៃការរៀបចំមហោស្រពចាប៉ីដងវែងទូទាំងប្រទេស គឺដើម្បីចូលរួមថែរក្សាលើកស្ទួយតម្លៃសិល្បៈវប្បធម៌ប្រពៃណីជាតិ អត្តសញ្ញាណជាតិ សម្ដៅរួមចំណែកអភិវឌ្ឍសង្គម និងលើកកម្ពស់ កិត្យានុភាពជាតិ។ ជាពិសេសគាំទ្រ និងលើកទឹកចិត្តដល់សិល្បករចាប៉ីដងវែង ឱ្យមានសកម្មភាពផុសផុលឡើងវិញ តាមរយៈការផ្សព្វផ្សាយឱ្យបានទូលំទូលាយជូនដល់មហាជនឱ្យបានស្គាល់ និងស្វែងយល់បន្ថែមអំពីទម្រង់ សិល្បៈចាប៉ីដងវែង។

នាឱកាសនោះលោកជំទាវ ឡងឌី សាន់ណារ៉ា រដ្ឋលេខាធិការ តំណាងដ៏ខ្ពង់ខ្ពស់ លោកជំទាវបណ្ឌិត សភាចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ បានអបអរសាទរដ៏ស្មោះចំពោះសិល្បករ ចាប៉ីដងវែងទាំងអស់ ដែលទទួលបានជ័យលាភីនៅក្នុងមហោស្រពនាថ្ងៃនេះ និងសូមលើកទឹកចិត្តដល់ប្អូនៗ ជាសិល្បករ ដែលមិនទទួលបានពានរង្វាន់ សុំបន្តការខិតខំប្រឹងប្រែងបន្តទៀត ដើម្បីរួមចំណែកលើកស្ទួយវិស័យសិល្បៈទស្សនីយភាពឱ្យកាន់តែរីកចំរើន ប្រកបដោយនិរន្តរភាព។ «មហោស្រពចាប៉ីដងវែង» មិនគ្រាន់តែជាវេទិកាប្រកួតប្រជែងយកពានរង្វាន់នោះទេ ប៉ុន្តែគឺជាទីកន្លែងជួបជុំសិក្សាស្វែងយល់វាស់ស្ទង់សមត្ថភាព និងការចែករំលែកបទពិសោធ និងចំណេះដឹងផងដែរ។ ដូចនេះគោលដៅសំខាន់ នៃការរៀបចំមហោស្រពចាប៉ីនាពេលនេះ គឺដើម្បីផ្តល់ឱកាសក្នុងការសិក្សាពីចំណុចខ្លាំង និងចំណុចខ្សោយ សំដៅពង្រឹងសមត្ថភាព និងលើកកម្ពស់ វិស័យសិល្បៈទស្សនីយភាពមួយនេះ ឱ្យកាន់ទៅរីកចម្រើនបន្ថែម។

ចំណែកបេក្ខជន ណូន សុខ មកពីខេត្តសៀមរាប (ពិការភ្នែក) ទទួលបានចំណាត់ថ្នាក់លេខ០១ បានបង្ហាញចំណាប់អារម្មណ៍សប្បាយរីករាយដែលមានសេចកី្តសុខ និងឈរនៅទីនេះ ពិសេសទទួលបានជ័យលាភីលេខ០១ ដោយសារប្រទេសជាតិមានសន្តិភាព សូមអរគុណសន្តិភាព! ព្រមទាំងសុំឲ្យលើកទឹកចិត្តដល់យុវជន យុវតី ដែលរៀនស្មូត រៀនចាប៉ី រៀនចម្រៀងបុរាណ សុំកុំបន្ទុចបង្អាក់ដោយសារអបីជំនឿ ព្រោះទាំងអស់នេះជាអត្តសញ្ញាណ កាលណាមិនលើកទឹកចិត្តគាត់ យូរៗទៅវានឹងបាត់បង់លែងមានអ្នករៀនហើយ នេះគឺជាគ្រោះថ្នាក់ដល់វប្បធម៌យើង។ ដូច្នេះសូមជួយគាំទ្រ គាំពារ និងផ្តល់នូវប្រយោជន៍សម្រាប់អ្នកដែលថែរក្សា អភិរក្ស និងអភិវឌ្ឍដោយកី្តយកចិត្តទុកដាក់ និងដោយកី្តស្រលាញ់ចំពោះវប្បធម៌ និងព្រលឹងរបស់ខ្មែរ។

សូមបញ្ជាក់ផងដែរថា ជាលទ្ធផលបេក្ខជន៣រូប ទទួលបានជ័យលាភីក្នុងវគ្គផ្តាច់ព្រ័ត្រ ដែលមានសមភាពដូចខាងក្រោម៖ ជ័យលាភីលេខ១ ទទួលបានពានមាស១ អមដោយទឹកប្រាក់ បានទៅលើបេក្ខជន ណូន សុខ មកពីខេត្តសៀមរាប, ជ័យលាភីលេខ២ ទទួលបានពានប្រាក់១ អមដោយទឹកប្រាក់ បានទៅលើបេក្ខជនសាត វណ្ណា មកពីរាជធានីភ្នំពេញ និងជ័យលាភីលេខ៣ ទទួលបានពានសំរិទ្ធ១ អមដោយទឹកប្រាក់ បានទៅលើបេក្ខជន សូរ សារ៉ន មកពីខេត្តស្វាយរៀង និងចំណាត់ថ្នាក់កិត្តិយស ២ក្រុម ទទួលបានប្រកាសនីយបត្រ អមដោយទឹកប្រាក់ បានទៅលើបេក្ខជនឈ្មោះ ឆុន តុលា មកពីខេត្តសៀមរាប និងបេក្ខជន ច្រឹក សេ មកពីខេត្តសៀមរាប៕ អត្ថបទ រដ្ឋា