កំពង់ឆ្នាំង៖ នៅព្រឹកថ្ងៃទី០៥ ខែតុលា ឆ្នាំ២០២៣នេះ អាណាព្យាបាលសិស្សកម្រិត​បឋម​សិក្សា​ដែល​មាន​អាយុ៩ឆ្នាំគត់ បានសំដែងនូវក្តីរំភើពរីករាយជាពន់ពេក និងថ្លែងអំណរគុណ​ដល់​សម្តេច​មហាបវរ​ធិបតេឲី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលបានផ្តល់​វ៉ាក់​សាំង​ការពារជំងឺ​មហារីកមាត់ស្បូនចាក់ជូនកូនចៅពួកគាត់នៅថ្ងៃនេះ ។ នៅព្រឹកនេះ ក្រុមគ្រូពេទ្យ នៃ​មន្ទីរសុខាភិបាល និងក្រុមគ្រូពេទ្យនៅតាមមណ្ឌលសុខភាពទាំង៤៥ទីតាំង បានដំណើរ​ការ​ចាក់​ជូន​កុមារីអាយុ៩ឆ្នាំ ក្នុងខេត្តកំពង់ឆ្នាំង មានប្រមាណជិត៥ពាន់នាក់ផងដែរ។

អាណាព្យាបាលសិស្សានុសិស្សដែលមានកូនស្រីអាយុ៩ឆ្នាំបានអោយដឹងថា៖ ពួកគាត់​ពិត​ជា​រំភើប​ណាស់ ពេលឃើញលោកវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្ត និងលោក យិន សាវ៉េន អភិបាលរងខេត្តតំណាងឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ដឹកនាំ​ក្រុម​គ្រូពេទ្យយកវ៉ាក់សាំងការពារជម្ងឺមហារីកស្បូន មកចាក់ជូន​កូន​ចៅ​របស់​ពួក​គាត់​ក្នុង​ថ្ងៃ​នេះ​ដោយ​មិន​គិតថ្លៃឡើយ។ ជាពិសេសពួកគាត់បានថ្លែងអំណរគុណដល់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលលោកតែងតែយកចិត្តទុកដាក់ដល់សុខទុកប្រជាពលរដ្ឋទាំងអស់ គ្រប់​ទីកន្លែងដូចសម្តេចតេជោ ហ៊ុន សែន អតីតនាយករដ្ឋមន្ត្រីដែរ។ ការចាក់វ៉ាក់សាំងនេះ នៅ​តាម​មន្ទីរ​ពេទ្យឯកជនប្រមាណ៧០ដុល្លាឡើងទៅ តែពេលនេះ សម្តេចធិបតី បានចាក់ជូន​ដោយ​ឥត​គិត​ថ្លៃទេ។

លោកវេជ្ជបណ្ឌិត ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង បានថ្លែងថា៖ ជំងឺ​មហារីក​មាត់​ស្បូន គឺជាជម្ងឺមហារីកដែលជួបញឹកញាប់បំផុត និងជាជំងឺ​មហារីក​ទី៤​ ក្នុង​ចំណោម​ស្ត្រី​ទូទាំង​ពិភពលោក ។ ក្នុងឆ្នាំ២០២០ គេរកឃើញជំងឺ​មហារីកមាត់ស្បូននេះ បានកើត​ឡើង​ច្រើន​នៅ​ក្នុងប្រទេសដែលមានចំណូលទាប និងមធ្យម។

នៅថ្ងៃនេះ ក្រោមការកចិត្តទុកដាក់ដ៏ខ្ពង់ខ្ពស់ពីសម្តេចមហាបវរធិបតី ហ៊ុន ម៉ាណែត នាយករដ្ឋ​មន្ត្រី , ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងឯកឧត្តម ស៊ុន សុវណ្ណារិទ្ធិ អភិបាលខេត្ត បានផ្តល់​ជូនកុមារី​អាយុ៩ឆ្នាំនៅ​តាម​សាលា​បឋម​សិក្សា​ទាំងអស់​ក្នុង​ខេត្តកំពង់ឆ្នាំង​ប្រមាណ​ជិត​៥ពាន់នាក់ ទទួល​បាន​ការ​ចាក់​វ៉ាក់សាំង​ការពារ​ជំងឺ​មហារីកមាត់​ស្បូន​ដោយ​ឥត​គិត​ថ្លៃ​។ ចំណែក​កុមារី​ដែល​មិន​បាន​ចូល​សាលា​រៀន​នៅ​តាម​បណ្តាភូ​មិ​នានា​មាន​ប្រមាណ​ជិត​៣០​នាក់​ទៀត ក៏ត្រូវទទួលបានការចាក់វ៉ាក់សាំងនេះដែរ៕ កាំង ហុងវាស្នា