ភ្នំពេញ ៖ ក្រុមកម្មករ កម្មការិនីជាច្រើននាក់មកពីតំបន់ខុសគ្នាក្នុងរាជធានីភ្នំពេញ បាននាំគ្នាមកទីភ្នាក់ងារជាតិមុខរបរ និងការងារ (NEA) ក្នុងគោលបំណងដើម្បីដាក់ពាក្យសម្ភាសន៍ការងារជាមួយតំណាងក្រុមហ៊ុន សហគ្រាស ដែលមានតម្រូវការកម្លាំងពលកម្មសរុបជាង ១ ៧០០ កន្លែង។

​អ្នកស្រី ជ័យ ផារី ស្រុកកំណើតនៅខេត្តតាកែវ បច្ចុប្បន្នរស់នៅផ្ទះជួលមួយកន្លែងស្ថិតនៅតំបន់កប់ស្រូវ ខណ្ឌពោធិ៍សែនជ័យ រាជធានីភ្នំពេញ បាននិយាយប្រាប់ទូរទស្សន៍ព័ត៌មាន ប៊ីធីវី នៅព្រឹកថ្ងៃទី៥ ខែតុលានេះថា អ្នកស្រីបានស្គាល់ទីភ្នាក់ងារជាតិមុខរបរ និងការងារ តាមរយៈក្រសួងការងារ និងបណ្តុះបណ្តាលវិជ្ជាជីវៈ ហើយគោលបំណងសំខាន់ក្នុងពេលនេះ គឺជូនសាច់ញាតិមកដាក់ពាក្យស្វែងរកការងារ និងដើម្បីស្វែងរកការងារថ្មីធ្វើបន្ថែមទៀតផងដែរ។

អ្នកស្រី ទូច លី និងលោក ប៉ិច ច័ន្ទ ពលរដ្ឋរស់នៅតំបន់វេងស្រេងដូចគ្នា បានឲ្យដឹងស្រដៀងគ្នាថា នេះជាលើក១ហើយ ដែលមកដល់ និងស្គាល់ទីភ្នាក់ងារជាតិមុខរបរ និងការងារ ដោយសារកន្លងមកការងារមានធ្វើ គឺទទួលបានតាមរយៈអ្នកស្គាល់គ្នាណែនាំប៉ុណ្ណោះ។ ពួកគាត់ បានបន្តថា តម្រូវការទីផ្សារការងារនៅទីនេះ ពិតជាមានច្រើននិងគ្រប់មុខតំណែង អ្វីដែលសំខាន់ជាងនេះ គឺខ្វះតែសមត្ថភាព និងចំណង់ចំណូលចិត្តដែលយើងចង់បំពេញការងារតែប៉ុណ្ណោះ។

កញ្ញា សោម ពីសី ជំនួយការធនធានមនុស្សរបស់ក្រុមហ៊ុន iapparel ផ្នែកផលិតសម្លៀកបំពាក់ និងកាបូប បានឲ្យដឹងថា សម្រាប់ក្រុមហ៊ុនកញ្ញាថ្ងៃនេះ ត្រូវការកម្លាំងពលកម្មសរុបប្រមាណ ៣០០កន្លែង មានដូចជាផ្នែករដ្ឋបាល និងផ្នែកដេរ។ កញ្ញា បានឲ្យដឹងថា សព្វថ្ងៃនេះក្នុងរោងចក្រមានការងារជាច្រើនកន្លែងផ្សេងទៀត ដែលត្រូវការកម្លាំងពលកម្មបន្ថែម ដោយសារការកើនឡើងនៃសង្វាក់ផលិតកម្មការងារ។

សូមបញ្ជាក់ថា នៅថ្ងៃទី៥ ខែតុលា ឆ្នាំ២០២៣ ក្រុមហ៊ុន និងរោងចក្រធំៗចំនួន៦ បានប្រកាសឱកាសការងារថ្មីបន្ថែមទៀតសរុបចំនួន ១ ៧០៦កន្លែង សម្រាប់យុវជនសិស្ស/និស្សិត និងអ្នកកំពុងស្វែងរកការងារធ្វើ ក្នុងវេទិកាការងារ ដែលរៀបចំដោយទីភ្នាក់ងារជាតិមុខរបរ និងការងារ (NEA) សហការជាមួយ ស.ស.យ.ក. វិស័យការងារ និងបណ្តុះបណ្តាលវិជ្ជាជីវៈ នៅបរិវេណក្រសួងការងារ និងបណ្តុះបណ្តាល វិជ្ជាជីវៈ ចាប់ពីព្រឹកម៉ោង៨ ដល់ម៉ោង ៥ល្ងាច៕ អត្ថបទ៖ ឈិត បូរ៉ាវី