អាមេរិក ៖ ក្រុមហ៊ុន Google ដែលជាបុត្រសម្ព័ន្ធរបស់ក្រុមហ៊ុន Alphabet កាលពីថ្ងៃពុធ (៤ តុលា) បានដាក់បង្ហាញទូរស័ព្ទស្មាតហ្វូនម៉ូឌែល ភីកសែល៨ (Pixel 8) និងនាឡិកាឆ្លាតវៃថ្មីមួយ ដែលរួមបញ្ចូលបច្ចេកវិទ្យាប្រាជ្ញាសិប្បនិម្មិត (AI) របស់ខ្លួនកាន់តែស៊ីជម្រៅ ទៅក្នុងឧបករណ៍ប្រើប្រាស់របស់ក្រុមហ៊ុននេះ។

ទូរស័ព្ទស្មាតហ្វូនម៉ូឌែល ភីកសែល របស់ក្រុមហ៊ុន Google ត្រូវបានរចនាឡើងដើម្បីបង្ហាញពីមធ្យោបាយដែលបណ្ដាផលិតផលរបស់ Android រុញដែនកំណត់នៃបច្ចេកវិទ្យាដែលមានស្រាប់។ ក្រុមហ៊ុន Google បានពង្រឹងស៊េរីទូរស័ព្ទ ភីកសែល ជាមួយនឹងប្រព័ន្ធដំណើរការទំនើបចុងក្រោយបំផុតរបស់ខ្លួន ដែលមានឈ្មោះថា ត្រនស័រ ជីស៊ីរ (Tensor G3)។ បន្ទះឈីបផ្ទាល់ខ្លួនថ្មីរបស់ក្រុមហ៊ុន Google មានសមត្ថភាពបច្ចេកវិទ្យា AI និងម៉ាស៊ីនពង្រឹងសម្ថភាពបន្ថែមទៀត ដែលឱ្យអ្នកប្រើប្រាស់អាចបំបែកទិន្នន័យបានកាន់តែច្រើននៅលើឧបករណ៍ និងក្នុងប្រព័ន្ធផ្ទុកទិន្នន័យ។

បណ្ដានាយកប្រតិបត្តិនៃក្រុមហ៊ុននេះ បាននិយាយនៅក្នុងព្រឹត្តិការណ៍ ម៉េត បាយ ហ្គូហ្គល (Made by Google) ក្នុងទីក្រុងញូវយ៉ក របស់សហរដ្ឋអាមេរិកកាលពីថ្ងៃពុធថា លក្ខណៈពិសេស AI អាចជួយក្នុងការថតរូប សង្ខេបទិន្នន័យគេហទំព័រ និងទប់ស្កាត់ការហៅទូរស័ព្ទដែលមិនមានប្រភពច្បាស់លាស់។ ទូរស័ព្ទ ភីកសែល៨ ប្រូ (Pixel 8 Pro) មានកម្មវិធីទែម៉ូម៉ែត្រដើម្បីវាស់សីតុណ្ហភាពរាងកាយ ដោយមានការយល់ព្រមពីរដ្ឋបាលចំណីអាហារ និងឱសថ ផងដែរ។

តម្លៃចាប់ផ្តើមពី៦៩៩ដុល្លារ សម្រាប់ទូរស័ព្ទ ភីកសែល៨ និងតម្លៃ៩៩៩ដុល្លារ សម្រាប់ទូរស័ព្ទ ភីកសែល៨ ប្រូ ដោយកើនឡើងចំនួន១០០ដុល្លារ ច្រើនជាងម៉ូឌែលជំនាន់មុន ហើយទូរស័ព្ទទាំងនោះនឹងមានលក់ចាប់ពីថ្ងៃទី១២ ខែតុលា ខាងមុខនេះ។ នៅក្នុងព្រឹត្តិការណ៍បញ្ចេញឧបករណ៍ម៉ូឌែលថ្មីនោះ ក្រុមហ៊ុននេះក៏បានប្រកាសអំពីនាឡិកាឆ្លាតវៃ ភីកសែល វ៉ច សេរី២ (Pixel Watch 2) ដែលមានតម្លៃចាប់ពី៣៤៩ដុល្លារ៕