វិធានការបណ្ដោះអាសន្នរយៈពេល ៤៥ថ្ងៃដែលត្រូវបានអនុម័តដោយសភាអាមេរិក ដើម្បីទប់ស្កាត់ការបិទផ្នែកខ្លះរបស់រដ្ឋាភិបាល បានធ្វើឲ្យខ្វះខាតថវិកានាពេលខាងមុខ ក្នុងការផ្ដល់ឲ្យបណ្ដារដ្ឋកោះជាយុទ្ធសាស្ត្រ នៅមហាសមុទ្រប៉ាស៊ីហ្វិក ដែលអ្នកវិភាគ និងអតីតមន្ត្រីមួយចំនួន បាននិយាយថា ធ្វើឲ្យសម្ព័ន្ធមិត្តអាមេរិកងាយរងគ្រោះផ្នែកសេដ្ឋកិច្ច និងអាចកាន់តែព្រមទទួលយកនូវវិធីសាស្រ្តរបស់ប្រទេសចិន។

រដ្ឋបាលរបស់លោក Joe Biden សង្ឃឹមថា នឹងទទួលបាននូវការអនុម័តពីសភាត្រឹមថ្ងៃទី៣០ ខែកញ្ញា លើកម្មវិធីផ្តល់មូលនិធិរយៈពេល ២០ឆ្នាំថ្មី សម្រាប់កោះ Micronesia ប្រជុំកោះ Marshall និង Palau ដោយបន្ទាប់ពីមិនត្រូវបានចាប់អាមរម្មណ៍រាប់ទសវត្សរ៍មក នាពេលនេះ កោះទាំងនេះបានមើលឃើញថា ពួកគេកំពុងស្ថិតនៅកណ្តាលនៃសមរភូមិរបស់សហរដ្ឋអាមេរិក ក្នុងការប្រជែងឥទ្ធិពលជាមួយប្រទេសចិន នៅតំបន់ប៉ាស៊ីហ្វិកភាគខាងជើង។

ប្រទេសដែលមានទំហំធំទូលាយ ប៉ុន្តែមានប្រជាជនតិចទាំងនោះ មានទំនាក់ទំនងជាមួយអាមេរិកដែលគ្រប់គ្រងដោយអ្វីដែលគេហៅថា Compacts of Free Association (COFAs) ក្រោមការដែលក្រុងវ៉ាស៊ីនតោនទទួលខុសត្រូវលើការការពារ និងផ្តល់ជំនួយសេដ្ឋកិច្ចដល់ពួកគេ ខណៈដែលទទួលបានសិទ្ធិយោធាផ្តាច់មុខចូលទៅកាន់តំបន់សមុទ្រជាយុទ្ធសាស្ត្រទាំងនេះ។

កម្មវិធីផ្តល់មូលនិធិសម្រាប់ប្រជុំកោះ Marshall និងកោះ Micronesia នឹងត្រូវបន្តឡើងវិញ នៅថ្ងៃទី៣០ ខែកញ្ញា ហើយសម្រាប់ប្រជុំកោះ Palau នៅចុងឆ្នាំសារពើពន្ធឆ្នាំ២០២៤ ហើយទីក្រុងវ៉ាស៊ីនតោន បានយល់ព្រមនៅឆ្នាំនេះលើកញ្ចប់ថវិកាថ្មីចំនួន ៧,១ពាន់លានដុល្លារអាមេរិក រយៈពេល ២០ឆ្នាំ ដោយត្រូវមានការយល់ព្រមពីសភា។

«ដំណោះស្រាយដែលកំពុងមានបន្ត» (CR) បណ្ដោះអាសន្ន ដែលរារាំងដល់ការបិទរដ្ឋាភិបាលសហព័ន្ធ មិនរួមបញ្ចូលការយល់ព្រមសម្រាប់កម្មវិធីថ្មីនេះទេ ហើយបើទោះបីជាការអនុម័តរយៈពេលខ្លីនេះ រក្សាសេវាកម្មសហព័ន្ធដល់រដ្ឋ COFA ទាំងនេះក៏ដោយ ក៏វាធ្វើឲ្យមាននូវចន្លោះប្រហោង ក្នុងផ្នែកផ្សេងទៀតនៃថវិការបស់ពួកគេដែរ៕