ក្រុមមន្ត្រីបាននិយាយថា យ៉ាងហោចណាស់មនុស្ស ១៤នាក់ បានស្លាប់ និង ១០២នាក់ផ្សេងទៀត ក្នុងនោះរួមទាំងបុគ្គលិកយោធាយ៉ាងហោចណាស់ ២២នាក់ បានបាត់ខ្លួន នៅភាគឦសានប្រទេសឥណ្ឌា គិតត្រឹមថ្ងៃព្រហស្បតិ៍ (ទី៥ ខែតុលា) នេះ បន្ទាប់ពីមានភ្លៀងធ្លាក់ខ្លាំងបណ្តាលឲ្យច្រាំងបឹងទឹកកកមួយបានបាក់ ដែលបង្កឲ្យមានទឹកជំនន់យ់ាងគំហុកភ្លាមៗហូរចុះតាមតំបន់ជ្រលងភ្នំ។

អាជ្ញាធរបានឲ្យដឹងថា គ្រោះមហន្តរាយដែលបានប៉ះពាល់ដល់អាយុជីវិតមនុស្សចំនួន ២២.០០០នាក់ គឺជាព្រឹត្តិការណ៍អាកាសធាតុដ៏អាក្រក់ថ្មីចុងក្រោយបំផុត នៅតំបន់ភ្នំរបស់ប្រទេសអាស៊ីខាងត្បូងមួយនេះ ដែលមហន្តរាយនេះត្រូវបានស្តីបន្ទោសទៅលើបម្រែបម្រួលអាកាសធាតុ។

អ្នកនាំពាក្យក្រសួងការពារជាតិ បានប្រាប់ឲ្យដឹងតាមរយៈបណ្ដាញសង្គម X (ពីមុនជា Twitter) ថា៖ «ប្រតិបត្តិការស្វែងរកកំពុងត្រូវបានអនុវត្តក្រោមលក្ខខណ្ឌអាកាសធាតុ ដែលមានភ្លៀងធ្លាក់ឥតឈប់ឈរ ទឹកហូរខ្លាំងនៅក្នុងទន្លេ Teesta ផ្លូវថ្នល់ និងស្ពាន រងការខូចខាត នៅទីកន្លែងជាច្រើន»។

ភ្លៀងធ្លាក់យ៉ាងខ្លាំងមួយមេធំ ក្នុងរយៈពេលខ្លី នៅលើបឹងទឹកកក Lhonak កាលពីថ្ងៃពុធ (ទី៤ ខែតុលា) បានបង្កឲ្យមានទឹកជំនន់យ៉ាងគំហុកភ្លាមៗហូរចុះទៅតាមតំបន់ជ្រលងភ្នំ Teesta ដែលមានចម្ងាយប្រហែល ១៥០គីឡូម៉ែត្រ នៅភាគខាងជើងនៃទីក្រុង Gangtok រដ្ឋធានីនៃរដ្ឋ Sikkim ជិតព្រំដែនជាមួយប្រទេសចិន។

រូបភាពវីដេអូពីទីភ្នាក់ងារសារព័ត៌មាន ANI បង្ហាញឲ្យឃើញពីទឹកជំនន់ជន់លិចក្នុងតំបន់ជាយក្រុង ដែលផ្ទះសម្បែងជាច្រើនខ្នង បានដួលរលំ មូលដ្ឋានទ័ព និងសម្ភារៈបរិក្ខារផ្សេងទៀត រងការបំផ្លិចបំផ្លញ ហើយរថយន្ត បានលិចនៅក្នុងទឹក៕