ការជជែកដេញដោលអំពីបញ្ហាអន្តោប្រវេសន៍នៅព្រំដែនភាគខាងត្បូងរបស់អាមេរិក កំពុងផ្ទុះឡើងជាថ្មីម្តងទៀត ដែលគ្របដណ្តប់លើការពិភាក្សានៅក្នុងការជជែកដេញដោលរបស់គណបក្សសាធារណរដ្ឋ បង្កឱ្យមានការរិះគន់លើគោលនយោបាយរបស់សេតវិមាន ក្នុងចំណោមសមាជិកបក្សប្រជាធិបតេយ្យ ដែលកំពុងកើនឡើង ហើយជំរុញឱ្យមានការផ្សាយព័ត៌មានទាំងនោះឡើងវិញនៅក្នុងបណ្ដាញប្រព័ន្ធផ្សព្វផ្សាយ និងការតវ៉ានៅក្នុងទីក្រុងជាច្រើន ដែលរងគ្រោះដោយលំហូរជនអន្តោប្រវេសន៍។

ខណៈពេលដែលមានសំណួរថាតើបញ្ហាអន្តោប្រវេសន៍ នឹងក្លាយជាប្រធានបទសំខាន់ក្នុងការបោះឆ្នោតប្រធានាធិបតីឆ្នាំ២០២៤ ដូចនៅឆ្នាំ២០២០ ដែរឬយ៉ាងណានោះ សន្ទុះវិបត្តិអន្តោប្រវេសន៍បាននិងកំពុងកើនឡើងក្នុងប៉ុន្មានសប្តាហ៍ថ្មីៗនេះ ហើយត្រូវបានបន្ថែមជាមួយនឹងសម្លេងប្រឆាំងដ៏តឹងតែង ទាំងពីក្នុងបក្សសាធារណរដ្ឋ និងបក្សប្រជាធិបតេយ្យ។

នៅក្នុងការពិភាក្សាដេញដោលបឋមរបស់បេក្ខជនប្រធានាធិបតីបក្សសាធារណរដ្ឋ លើកទីពីរ បណ្ដាបេក្ខជនបានលើកឡើងអំពីពាក្យ «ព្រំដែន» ចំនួនរាប់សិបដង ដោយអ្នកខ្លះបានគំរាមកំហែងការប្រើប្រាស់អន្តរាគមន៍យោធា ដើម្បី «កម្ចាត់» ក្រុមជួញដូរគ្រឿងញៀននៅក្នុងប្រទេសម៉ិកស៊ិក និងធានាសន្តិភាពព្រំដែនផងដែរ។

សារព័ត៌មាន NBC បានរាយការណ៍ថា កំណើននៃការតាមដានលើចំនួនជនអន្តោប្រវេសន៍ឆ្លងកាត់ដោយខុសច្បាប់តាមព្រំដែនអាមេរិក-ម៉ិកស៊ិក បានកើនឡើងជាលំដាប់ចាប់តាំងពីដើមខែកញ្ញាមក ដោយមានជនអន្តោប្រវេសន៍ជាង ២០ម៉ឺននាក់ បានឆ្លងកាត់ដោយខុសច្បាប់កាលពីខែមុន ដែលជាកំណត់ត្រាខ្ពស់បំផុតសម្រាប់ឆ្នាំ២០២៣នេះផងដែរ៕