សមាជិកព្រឹទ្ធសភាជនជាតិដើមភាគតិច ក្នុងប្រទេសអូស្ត្រាលី បាននិយាយ នៅថ្ងៃព្រហស្បតិ៍ (ទី៥ ខែតុលា) នេះ ថា លោកបានក្លាយជាគោលដៅនៃការគំរាមកំហែង និងការរំលោភបំពានលើពូជសាសន៍ ក្នុងវីដេអូមួយ នៅលើបណ្ដាញសង្គម ពោលគឺនៅប៉ុន្មានថ្ងៃមុនការបោះឆ្នោតប្រជាមតិស្តីពីថា តើត្រូវទទួលស្គាល់ដោយរដ្ឋធម្មនុញ្ញ ចំពោះប្រជាជនជនជាតិដើម និងប្រជាជនកោះ Torres Strait របស់ខ្លួនដែរ ឬទេ។

វីដេអូមួយដែលត្រូវបានផ្សព្វផ្សាយតាមប្រព័ន្ធអ៊ីនធឺណេត បានបង្ហាញឲ្យឃើញពីបុរសម្នាក់ពាក់មួកចំហមុខបន្តិចបន្តួច ដែលអះអាងថា មកពីក្រុមនេអូ-ណាស៊ី ដុតទង់ជាតិជនជាតិដើមភាគតិច សម្តែងការគោរពបែបណាស៊ី និងគំរាមកំហែងសមាជិកព្រឹទ្ធសភាលោកស្រី Lidia Thorpe ។

ក្រោយកើតមានករណីនោះ អំឡុងពេលសន្និសីទសារព័ត៌មាន នៅទីក្រុងមែលប៊ន លោកស្រី Thorpe បានលើកជាសំណួរថា៖ «តើការគាំទ្ររបស់ខ្ញុំនៅឯណា? ការការពាររបស់ខ្ញុំនៅឯណា នៅក្នុងប្រទេសនេះ»។

លោកស្រី Thorpe កំពុងធ្វើយុទ្ធនាការសម្រាប់ការបោះឆ្នោត «ទេ» (មិនយល់ព្រម) និងអំពាវនាវឲ្យមានសន្ធិសញ្ញា រវាងរដ្ឋាភិបាល និងជនជាតិដើមភាគតិចជាមុន ស្រដៀងទៅនឹងអ្វីដែលមាននៅក្នុងប្រទេសនូវ៉ែលហ្សេឡង់ និងកាណាដា។ នាយករដ្ឋមន្ត្រី លោក Anthony Albanese បាននិយាយថា រូបត្រូវបានលោកស្រី Thorpe ទាក់ទង ហើយលោកបានប្រតិកម្មភ្លាមៗ ហើយក៏បាននិយាយរឿងនេះទៅកាន់នគរបាលផងដែរ។

ការគំរាមកំហែងរើសអើងជាតិសាសន៍ប្រឆាំងនឹងជនជាតិដើម ដែលមានចំនួនប្រហែល ៣,៨ភាគរយនៃចំនួនប្រជាជន បាន និងកំពុងកើនឡើងនៅក្នុងរយៈពេលមុនដល់ការបោះឆ្នោតប្រជាមតិ ដែលត្រូវបានជំរុញដោយព័ត៌មានមិនពិត និងការភ័យខ្លាចអំពីយុទ្ធនាការ «Yes» (យល់ព្រម)៕