ការស៊ើបអង្កេតដឹកនាំដោយអង្គការសហប្រជាជាតិ (UN) លើអ្វីដែលអ្នកស៊ើបអង្កេតនិយាយថា កំពុងបន្តមានអំពើឃោរឃៅនៅក្នុងប្រទេសអេត្យូពីប្រឈមនឹងការបិទបញ្ចប់ បន្ទាប់ពីគេហទំព័ររបស់អង្គការសហប្រជាជាតិ កាលពីថ្ងៃពុធ (ទី៤ ខែតុលា) បានបង្ហាញថា គ្មានសំណើណាមួយ ត្រូវបានទទួល ដើម្បីបន្តដំណើរការនេះ។

សហភាពអឺរ៉ុបបានសន្យាផ្តល់កញ្ចប់ថវិកាជំនួយដល់ប្រទេសអេត្យូពីចំនួន ៦៨០លានដុល្លារ កាលពីថ្ងៃអង្គារ (ទី៣ ខែតុលា) ដែលខ្លួនបានពន្យារ ក្នុងឆ្នាំ២០២១ ដោយសារតែសង្គ្រាម ហើយបាននិយាយថា ភាគីទាំង២ កំពុងធ្វើការដើម្បី «ធ្វើឲ្យប្រក្រតីភាពទំនាក់ទំនងជាបណ្ដើរៗ»។ លោកស្រី Jutta Urpilainen ស្នងការសហភាពអឺរ៉ុបសម្រាប់ភាពជាដៃគូអន្តរជាតិ បានប្រាប់ទីភ្នាក់ងារសារព័ត៌មាន Reuters ថា ការសន្យាគឺស្ថិតនៅក្នុងលក្ខខណ្ឌ ដែលប្រទេសអេត្យូពីនឹងធានាឲ្យមានការទទួលខុសត្រូវជាមុនសិន។

គួរបញ្ជាក់ដែរថា មនុស្សរាប់ពាន់នាក់បានស្លាប់នៅក្នុងជម្លោះរយៈពេល ២ឆ្នាំ រវាងរដ្ឋាភិបាល និងកងកម្លាំងក្នុងតំបន់ពីទីក្រុង Tigray ដែលបានបញ្ចប់ជាផ្លូវការ ក្នុងខែវិច្ឆិកាឆ្នាំមុន។ ភាគីទាំងពីរបានចោទប្រកាន់គ្នាទៅវិញទៅមកអំពីអំពើឃោរឃៅ រួមទាំងការសម្លាប់រង្គាល ការចាប់រំលោភ និងការឃុំខ្លួនដោយបំពាន ប៉ុន្តែភាគីនីមួយៗបានបដិសេធមិនទទួលខុសត្រូវចំពោះការរំលោភបំពានជាប្រព័ន្ធនេះទេ។

គណៈកម្មាធិការអន្តរជាតិនៃអ្នកជំនាញសិទ្ធិមនុស្សនៅប្រទេសអេត្យូពី (ICHREE) ដែលបង្កើតឡើងដោយក្រុមប្រឹក្សាសិទ្ធិមនុស្សរបស់អង្គការសហប្រជាជាតិក្នុងឆ្នាំ២០២១ បន្ទាប់ពីមានញាត្តិដែលដាក់ដោយសហភាពអឺរ៉ុ បាននិយាយកាលពីខែមុនថា ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិនៅតែត្រូវបានប្រព្រឹត្តនៅអេត្យូពី។ តែអេត្យូពី ដែលបដិសេធការប្រព្រឹត្តបំពានយ៉ាងទូលំទូលាយ បានប្រឆាំងយ៉ាងខ្លាំងចំពោះការស៊ើបអង្កេតនេះ ហើយបានព្យាយាមកាត់បន្ថយការងាររបស់ខ្លួន៕