វិទ្យាស្ថានសម្រាប់ការសិក្សាសង្គ្រាម(ISW)បានសរសេរក្នុងរបាយការណ៍របស់ខ្លួន កាលពីថ្ងៃទី៤ ខែតុលាថា កាលពីពេលថ្មីៗនេះ កងកម្លាំងរុស្ស៊ី បានផ្លាស់ប្តូរទីតាំងនាវារបស់កងនាវាសមុទ្រខ្មៅជាច្រើនពីកំពង់ផែ Sevastopol ក្នុងតំបន់គ្រីម៉េ (Crimea)ដែលខ្លួនកាន់កាប់ ទៅកាន់កំពង់ផែ Novorossiysk ប្រទេសរុស្ស៊ី ទំនងជាកំពុងប្រឹងប្រែង ដើម្បីការពារនាវាពីការវាយប្រហារបន្ថែមទៀតរបស់អ៊ុយក្រែន។

យោងតាមរូបភាពផ្កាយរណប ចាប់ពីថ្ងៃទី១និងថ្ងៃទី៣ ខែតុលា យោធារុស្ស៊ី បានចល័តនាវាយ៉ាងហោចណាស់ ១០គ្រឿង រួមទាំងនាវាចម្បាំង Admiral Makarov និង Admiral Essen ពីកំពង់ផែ Sevastopol ទៅកាន់កំពង់ផែNovorossiysk។

ការផ្លាស់ប្តូរទីតាំងនេះ ក៏ត្រូវបានគេរាយការណ៍ថា រួមមាន នាវាមុជទឹកម៉ាស៊ូតចំនួនបីគ្រឿង នាវាប្រយុទ្ធ ចំនួន៥គ្រឿង និងនាវាបំពាក់មីស៊ីលតូចៗជាច្រើនគ្រឿងទៀត។

ISW ចាត់ទុកការផ្លាស់ប្តូរទីតាំងនាវានេះថា ជាវិធាការការពារ ទោះបីជាខ្លួនបានកត់សម្គល់ឃើញថា វិទ្យាស្ថានស្រាវជ្រាវមួយ ដែលជាមជ្ឈមណ្ឌលសម្រាប់ការវិភាគយុទ្ធសាស្ត្រ និងបច្ចេកវិទ្យា បានអះអាងថា ការផ្លាស់ប្តូរនេះ គឺជាទម្លាប់ទៅហើយ។