លោក Alfred Nikiema គឺជានិស្សិតពេទ្យមួយរូបរបស់ប្រទេសបួគីណា ហ្វាសូ ដែលបានរំភើបចិត្តជាខ្លាំង ពេលគាត់អានអ៊ីម៉ែលពីសាកលវិទ្យាល័យរបស់លោក អនុញ្ញាតឲ្យលោកចាប់ផ្តើមឯកសារទិដ្ឋាការឡើងវិញ សម្រាប់ការហ្វឹកហាត់នៅមន្ទីរពេទ្យបារាំងនាឆ្នាំក្រោយនោះ កំពុងស្ថិតក្នុងស្ថានភាពមិនច្បាស់លាស់ ចាប់តាំងពីបារាំងផ្អាកសេវាកម្មកុងស៊ុលនៅក្នុងប្រទេសមួយនេះ ។ 

 ក្រុមនិស្សិត ក្រុមអ្នកស្រាវជ្រាវ និងក្រុមវិចត្រកររាប់រយនាក់ មានដំណើរលក្ខណៈអាជីពនាពេលខាងមុខទៅកាន់ប្រទេសបារាំងដែលអាចចំណាយពេលរាប់ខែរៀបចំផែនការនោះ បានស្ថិតក្នុងស្ថានភាពពុំច្បាស់លាស់ ចំពោះការទទួលបានទិដ្ឋាការរបស់ពួកគេ ដោយសារតែទំនាក់ទំនងកាន់តែធ្ងន់ធ្ងរខ្លាំងជាមួយបារាំង បន្ទាប់ពីមានរដ្ឋប្រហារជាបន្តបន្ទាប់នៅបួគីណា ហ្វាសូ ម៉ាលី និងនីហ៊្សេ ក្នុងរយៈពេល ៣ឆ្នាំកន្លងមកនេះ ។

 របបសឹកដែលបានរឹបអូសអំណាច បានងាកមកប្រឆាំងនឹងអតីតមហាអំណាចអាណានិគមបារាំង ដោយចាប់ផ្តើមបណ្តេញទាហាន និងឯកអគ្គរដ្ឋទូតចេញពីប្រទេសរបស់ពួកគេ ស្របពេលដែលស្មារតីប្រឆាំងបារាំងកើនឡើង ។

 ក្រុមអ្នករិះគន់បារាំង និយាយថា អតីតមហាអំណាចអាណានិគមមួយនេះ បានព្យាយាមរក្សាសេដ្ឋកិច្ចហួសហេតុ និងឥទ្ធិពលនយោបាយរយៈពេលច្រើនទសវត្សរ៍ បើទោះបីជានៅក្រោយប្រទេសជាច្រើនទទួលបានឯករាជ្យរបស់ពួកគេក៏ដោយ ។ បារាំងនិយាយថា ពួកគេបានដកខ្លួនចេញពីថាមវន្តមួយនេះទៅហើយ ។

 ប៉ុន្តែស្របពេលដែលទំនាក់ទំនងជាមួយបណ្តារដ្ឋមួយចំនួននៅអាហ្វ្រិកខាងលិចប្រែជាជូរចត់ខ្លាំង បង្ខំឲ្យបារាំងបិទសេវាកម្មកុងស៊ុលរបស់ខ្លួននៅប្រទេសបួគីណា ហ្វាសូ ម៉ាលី និងនីហ៊្សេ ដោយសារតែក្តីកង្វល់សន្តិសុខនោះ ទំនាក់ទំនងវប្បធម៌យូរអង្វែងរបស់ពួកគេ បានជាប់គាំង ។ 

 មាននូវក្តីកង្វល់ផងដែរថា បញ្ហាទិដ្ឋាការនេះ អាចនឹងជំរុញបន្ថែមទៀតឲ្យមានស្មារតីប្រឆាំងបារាំង និងទំនាក់ទំនងជាប់គាំង ធ្វើឲ្យកើតមានភាពស្រពិចស្រពិលបន្ថែមទៀតចំពោះអនាគតបារាំងនៅក្នុងតំបន់មួយនេះ ស្របពេលដែលលោកប្រធានាធិបតី Emmanuel Macron ព្យាយាមបង្កើតទំនាក់ទំនងឡើងវិញជាមួយអតីតអាណានិគមរបស់ខ្លួន ស្របពេលមានការប្រកួតប្រជែងពីចិន និងរុស្ស៊ី ។

 យោងតាមប្រភពការទូតបារាំង បានឲ្យដឹងថា កាលពីឆ្នាំមុន បារាំង បានផ្តល់ទិដ្ឋាការប្រហែល ៩០០សន្លឹកសម្រាប់ពលរដ្ឋបួគីណា ហ្វាសូ ជាង ៦០០សន្លឹកដល់ពលរដ្ឋម៉ាលី និង ៤៣៦សន្លឹក ដល់ពលរដ្ឋនីហ៊្សេ ដែលស្វែករកការសិក្សា ឬស្នាក់នៅសិក្សាក្នុងប្រទេសមួយនេះ ៕