នគរបាលថៃ បានចាប់ខ្លួនមនុស្ស៤នាក់នៅថ្ងៃព្រហ្បតិ៍នេះ ដែលសង្ស័យពីការលក់កាំភ្លើងកែច្នៃដោយខុសច្បាប់ ទៅឲ្យជនសង្ស័យអាយុ១៤ឆ្នាំ ដែលបានធ្វើការវាយប្រហារបាញ់រះ នៅផ្សារទំនើបទីក្រុងបាងកក បណ្តាលឲ្យមនុស្ស២នាក់ស្លាប់។

ក្មេងជំទង់ម្នាក់ ត្រូវបានចោទប្រកាន់ពីបទឃាតកម្ម ជុំវិញការបាញ់ប្រហារកាលពីថ្ងៃអង្គារ នៅផ្សារទំនើប ស្យាម ប៉ារ៉ាហ្គន ដែលនគរបាលនិយាយថា ត្រូវបានធ្វើឡើងដោយកាំភ្លើងខ្លីបាញ់លេងក្នុងទីលំហ ដែលកែច្នៃបាញ់គ្រាប់ពិត។

ក្រុមមន្ត្រីក្នុងខេត្តYala នៅភាគខាងត្បូងជ្រៅរបស់ប្រទេសថៃ បានចាប់ខ្លួនមនុស្ស២នាក់ កាលពីព្រឹកថ្ងៃព្រហស្បតិ៍នេះ លើការសង្ស័យលក់អាវុធទៅឲ្យក្មេងប្រុសនេះ។

នគរបាលខេត្ត Yala បានប្រាប់សារព័ត៌មាន AFP ថា នគរបាលបានឆ្មក់ចូលលំនៅឋាន របស់ពួកគេ ដើម្បីរកភស្តុតាងបន្ថែមទៀត ដែលជាប់ពាក់ព័ន្ធក្នុងករណីនេះ។ ពួកគេ ត្រូវបានបញ្ជូនទៅកាន់ទីក្រុងបាងកក សម្រាប់ការសាកសួរ។

សារព័ត៌មានរ៉យទ័រ បានរាយការណ៍ថា មនុស្ស២នាក់ផ្សេងទៀត ត្រូវបានចាប់ខ្លួនក្នុងទីក្រុងបាងកក។