ភ្នំពេញ៖ លោក សាជា អ៊ូមុំា អាឡាម តំណាងអង្គការយូណេស្កូប្រចាំកម្ពុជា បានអះអាងថា ដើម្បីគាំទ្រប្រទេសកម្ពុជា សម្រេចបានចក្ខុវិស័យក្នុងយុទ្ធសាស្ត្របញ្ចកោណដំណាក់កាលទី១នេះ អង្គការយូណេស្កូ នឹងបន្តការខិតខំប្រឹងប្រែងធ្វើការយ៉ាងជិតស្និទ្ធជាមួយក្រសួងអប់រំយុវជន និងកីឡា ក្នុងការអនុវត្តកម្មវិធីគាំទ្របរិវត្តកម្មវិស័យអប់រំចាប់ពីឆ្នាំ ២០២៤ ដែលមានការគាំទ្រថវិកាពី GPE ផ្អែកលើសមិទ្ធិផលសម្រេចបានក្នុងគម្រោង STEPCam ដើម្បីបន្តគាំទ្រការអភិវឌ្ឍគ្រូបង្រៀនទូទាំងប្រទេសកម្ពុជា។

លោក សាដា អ៊ូម៉ា អាឡាម តំណាងអង្គការយូណេស្កូប្រចាំកម្ពុជា បានថ្លែងថា រាជរដ្ឋាភិបាលថ្មីនីតិកាលទី៧នៃរដ្ឋសភា ដែលដឹកនាំដោយសម្ដេចមហាបរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានដាក់ឱ្យអនុវត្តយុទ្ធសាស្ត្របញ្ចកោណដំណាក់កាលទី១ ក្នុងនោះវិស័យអប់រំជាវិស័យអាទិភាពយុទ្ធសាស្ត្រទីមួយក្នុងការអភិវឌ្ឍជាតិ។ អង្គការយូណេស្កូមានការវាយតម្លៃខ្ពស់ចំពោះការចាត់អាទិភាពយុទ្ធសាស្ត្រទៅលើការអភិវឌ្ឍធនធានមនុស្សជាយុទ្ធសាស្ត្រចម្បង ដោយសង្កត់ធ្ងន់លើកំណែទម្រង់ការអប់រំ និងទទួលស្គាល់ថាគ្រូបង្រៀន គឺជាឆ្អឹងខ្នងសម្រាប់ជំរុញការអប់រំប្រកបដោយគុណភាព។

 លោកបានបន្តថា ក្រោមកិច្ចសហប្រតិបត្តិការជាមួយក្រសួងអប់រំ និងដៃគូអភិវឌ្ឍន៍ដទៃទៀតអង្គការយូណេស្កូបានរួមចំណែកក្នុងការគាំទ្រកំណែទម្រង់គ្រូ បង្រៀនគួរឱ្យកត់សម្គាល់ ហើយសម្រេចបានជោគជ័យក្នុងការអនុវត្តគម្រោងពង្រឹងកម្មវិធីអប់រំគ្រូបង្រៀននៅកម្ពុជា (STEP Cam) ក្នុងការដំឡើងគុណវុឌ្ឍិនិងអភិវឌ្ឍសមត្ថភាពវិជ្ជាជីវៈគ្រូឧទ្ទេស បង្កើនសមត្ថភាពគ្រូបង្រៀនកម្រិតថ្នាក់ដំបូង និងជួសជុលកែលម្អហេដ្ឋារចនាសម្ព័ន្ធនៅសាលាគរុកោសល្យ និងវិក្រឹតការខេត្ត ដើម្បីបង្កើនវិជ្ជាជីវៈអាជីពដល់គ្រូបង្រៀន និងវិស័យអប់រំទាំងមូលនៅប្រទេសកម្ពុជាដោយត្រូវបានទទួលស្គាល់ និងកោតសរសើរយ៉ាងខ្លាំងពីសំណាក់ដៃគូអភិវឌ្ឍន៍រួមទាំង GPE ផងដែរ។

  លោក សាដា អ៊ូម៉ា អាឡាម ជំរុញឱ្យមានការទទួលស្គាល់ និងប្រារព្ធនូវការបំពេញការងារដែលមិនចេះនឿយហត់របស់គ្រូបង្រៀនទូទាំងប្រទេសកម្ពុជា។ នៅក្នុងពិភពឌីជីថលដែលមានការផ្លាស់ប្ដូរ និងកើនឡើងយ៉ាងឆាប់រហ័ស គ្រូបង្រៀនចាំបាច់ត្រូវទទួលបានការគាំទ្រដើម្បីអភិវឌ្ឍចំណេះដឹង និងបំណិន សម្រាប់នវានុវត្តន៍ធ្វើឱ្យមានការផ្លាស់ប្ដូរក្នុងថ្នាក់រៀន ដែលមានផលជះជាវិជ្ជមានដល់សង្គមទាំងមូល។ លោកបន្តថា បើគ្មានការលះបង់ និងទឹកចិត្តដ៏មោះមុតរបស់គ្រូបង្រៀនទេ នឹងមិនអាចសម្រេចបានបំណងប្រាថ្នានិងអនាគតដ៏ភ្លឺស្វាងឡើយ៕

អត្ថបទ ៖ សុភារម្យ