ទាហានអ៊ុយក្រែនដែលកំពុងធ្វើសង្រ្គាមប្រឆាំងនឹងការវាយលុករបស់រុស្ស៊ី បាននិយាយកាលពីថ្ងៃពុធថាជំនួយហិរញ្ញវត្ថុពីសហរដ្ឋអាមេរិក សំខាន់សម្រាប់ពង្រឹងកងទ័ព ទោះបីជាយ៉ាងណាក៏ដោយ វាមិនមែនជាប្រភពមានតែមួយគត់នៃជំនួយបរទេសនោះទេ ។

 ទាហានបម្រើនៅក្នុងកងពលតូចថ្មើជើងលេខ ៥៩ បានបង្ហាញការព្រួយបារម្ភថា ការផ្អាកជំនួយសហរដ្ឋអាមេរិក អាចនឹងមានន័យថា សង្រ្គាមនឹងចំណាយពេលយូរជាងនេះ ។

 លោក Bogdan វ័យ ២៣ឆ្នាំ គឹជាទាហានមួយរូបរបស់អ៊ុយក្រែន និយាយថា ខ្ញុំបានឮក្រុមតំណាងសហភាពអឺរ៉ុបនិយាយថា បើទោះបីជាសហរដ្ឋអាមេរិកធ្វើអ្វីក៏ដោយ ពួកគេនឹងមិនផ្អាកការគាំទ្រនោះទេ ។ វាមានន័យថា ពួកយើងតែងតែមានសម្ព័ន្ធមិត្ត ។ 

 លោកបន្តថា ខ្ញុំគិតថា អ្នករាល់គ្នាយល់ថា រុស្ស៊ីគឺជាអ្នកវាយលុកធំ ដែលជាការគំរាមកំហែងបច្ចុប្បន្នសម្រាប់អ៊ុយក្រែន ប៉ុន្តែមាននរណាដឹងថាតើនឹងមានរឿងអ្វីកើតឡើងបន្ទាប់ ។ ថ្ងៃនេះ ពួកយើងរងការគំរាមកំហែង ថ្ងៃស្អែក ពួកគេនឹងរងការគំរាមកំហែងម្តង វាជារឿងល្អប្រសើរក្នុងការជួយពួកយើងនៅថ្ងៃនេះ ។

 គួរឲ្យដឹងថា សភាសហរដ្ឋអាមេរិក ពុំរួមបញ្ចូលប្រាក់ជំនួយថ្មីនោះទេសម្រាប់អ៊ុយក្រែន នៅក្នុងសេចក្តីព្រាងច្បាប់ឈប់ការចំណាយសហរដ្ឋអាមេរិក ដែលពួកគេបានអនុម័យកាលពីថ្ងៃសៅរ៍ក្នុងការបើកទូលាយរដ្ឋាភិបាលសហព័ន្ធ ដែលនេះបានឆ្លុះបញ្ចាំងពីភាពស្ទាក់ស្ទើរកើនឡើងរបស់សមាជិកសភាមួយចំនួនមកពីគណបក្សសាធារណរដ្ឋ ដើម្បីផ្តល់មូលនិធិដល់ទីក្រុងគីវ ។

 ក្រុមសាធារណរដ្ឋមួយក្តាប់តូច បានរិះគន់ជំនួយយោធាដល់អ៊ុយក្រែនតាំងពីដំបូងមកម្ល៉េះ ដោយពួកគេចោទប្រកាន់រដ្ឋាភិបាលក្នុងទីក្រុងគីវ ពុំបានប្រយុទ្ធប្រឆាំងឲ្យបានគ្រប់គ្រាន់នឹងអំពើពុករលួយ ដែលក្រុមមន្រ្តីអ៊ុយក្រែន និងសហរដ្ឋអាមេរិក បានធ្វើការច្រានចោលទាំងស្រុង ។

 សូមបញ្ជាក់ថា ជំនួយយោធាសហរដ្ឋអាមេរិក និងសម្ព័ន្ធមិត្តលោកខាងលិច ចាំបាច់ខ្លាំងសម្រាប់ឲ្យអ៊ុយក្រែនវាយបកប្រឆាំងការវាយលុកទ្រង់ទ្រាយធំរបស់រុស្ស៊ី ចាប់តាំងពីខែកុម្ភៈ ឆ្នាំ ២០២២រហូតមក ៕