កាលពីថ្ងៃពុធម្សិលមិញ ប្រទេសប៉ូឡូញ សាធារណរដ្ឋឆេក និងប្រទេសអូទ្រីស បានចាប់ផ្តើមការគ្រប់គ្រងបណ្តោះអាសន្នព្រំដែនរបស់ពួកគេជាមួយប្រទេសស្លូវ៉ាគី ស្របពេលដែលប្រទេសមួយនេះខ្លួនឯងផ្ទាល់ បានដាក់ចេញការគ្រប់គ្រងបណ្តោះអាសន្នដូចគ្នាលើព្រំដែនជាមួយប្រទេសហុងគ្រី ដោយចាប់ផ្តើមអនុវត្តន៍ពីថ្ងៃព្រហស្បតិ៍នេះតទៅ ដោយសារតែកំណើនចំនួនមកដល់របស់ជនអន្តោប្រវេសន៍ខុសច្បាប់ ។

 យោងតាមទិន្នរដ្ឋាភិបាល បានឲ្យដឹងថា ចំនួនជនអន្តោប្រវេសន៍ដែលបានចូលទឹកដីស្លូវាគី ដែលពួកគេភាគច្រើនមកពីតំបន់មជ្ឈិមបូព៌ា និងប្រទេសអាហ្វហ្គានីស្ថាននោះ បានកើនឡើង ១១ដង រហូតដល់ជិត ៤ម៉ឺននាក់ ក្នុងឆ្នាំនេះ ស្របពេលដែលពួកគេព្យាយាមឆ្លងកាត់ប្រទេសហុងគ្រី ហើយនិងធ្វើដំណើរបន្តឆ្ពោះទៅកាន់ប្រទេសអាល្លឺម៉ង់ និងអឺរ៉ុបខាងលិច ។

 នៅក្នុងខែកញ្ញាតែមួយ ការធ្វើអន្តោប្រវេសន៍មកកាន់ប្រទេសស្លូវ៉ាគី មានចំនួនខ្ពស់បំផុត រហូតដល់ស្មើចំនួនជនអន្តោប្រវេសន៍ទាំងអស់អំឡុងឆ្នាំ ២០២២ ។

 ការត្រួតពិនិត្យរបស់ស្លូវ៉ាគីនៅតាមព្រំដែនរបស់ខ្លួនជាមួយប្រទេសហុងគ្រីដែលបានសម្រេចចិត្តក្រោយការជំទាស់ដំបូងនោះ ចាប់ផ្តើមពីថ្ងៃព្រហស្បតិ៍នេះតទៅ និងមានរយៈពេល ១០ថ្ងៃ ។

 ដោយឡែក សាធារណរដ្ឋឆេក ប៉ូឡូញ និងប្រទេសអូទ្រីស បានចាប់ផ្តើមគ្រប់គ្រងព្រំដែនបណ្តោះអាសន្នរបស់ពួកគេជាមួយប្រទេសស្លូវ៉ាគី កាលពីថ្ងៃពុធ ស្របពេលដែលអាល្លឺម៉ង់ ណែនាំឲ្យមានការគ្រប់គ្រងព្រំដែនថ្មីជាមួយប្រទេសប៉ូឡូញ និងសាធារណរដ្ឋឆេកកាលពីសប្តាហ៍មុន ៕