ហេតុការណ៍បាញ់ប្រហារ ក្នុងហាងលក់ទំនិញដ៏ទំនើប នៅទីក្រុងបាងកក ប្រទេសថៃ កាលពីថ្ងៃអង្គារ (ទី៣ ខែតុលា) នៅពេលដែលក្មេងជំទង់ម្នាក់ បានសម្លាប់មនុស្ស ២នាក់ និងធ្វើឲ្យជាច្រើននាក់ទៀតរងរបួស បាននាំឲ្យមានការចាប់អារម្មណ៍យ៉ាងខ្លាំងលើសុខភាពផ្លូវចិត្តរបស់យុវជនថៃ និងការអំពាវនាវឲ្យរឹតបន្តឹងការគ្រប់គ្រងនូវការប្រើប្រាស់កាំភ្លើង។

ជនដៃដល់ ដែលត្រូវបាននគរបាលកំណត់អត្តសញ្ញាណថា ជាក្មេងជំទង់អាយុ ១៤ឆ្នាំម្នាក់ មានបញ្ហាសុខភាពផ្លូវចិត្ត បានធ្វើការបាញ់ប្រហារដោយប្រើកាំភ្លើងខ្លីកែច្នៃ ក្នុងហាងលក់ទំនិញ នៅកណ្តាលទីក្រុងបាងកក ដែលជាកន្លែងអ៊ូអរទៅដោយអ្នកនៅរស់នៅមូលដ្ឋាន និងបណ្ដាអ្នកទេសចរ មុនពេលព្រមប្រគល់ខ្លួនប្រហែលមួយម៉ោងពេលក្រោយ។

ឧបទ្ទវហេតុនេះបានលាតត្រដាងឲ្យឃើញនូវបញ្ហានៃបទប្បញ្ញត្តិរបស់ថៃលើការគ្រប់គ្រងអាវុធ ដែលបានកើតឡើងទៀត ក្នុងរយៈពេលមិនដល់មួយឆ្នាំផង បន្ទាប់ពីការបាញ់ប្រហារដ៏ធំ នៅមជ្ឈមណ្ឌលថែទាំកូនក្មេង និងតំបន់ក្បែរនោះ ក្នុងខេត្តណងប៊ួឡាំភូ (Nong Bua Lamphu) បានសម្លាប់មនុស្ស ៣៦នាក់ ក្នុងនោះរួមទាំងកុមារតូចៗ ២៤នាក់ផងដែរ។

ក្រោយកើតហេតុការណ៍នេះ លោកបណ្ឌិត Krisanaphong Poothakool អ្នកឯកទេសខាងឧក្រិដ្ឋកម្មមកពីសាកលវិទ្យាល័យរ៉័ងស៊ីត (Rangsit) បានប្រាប់ប្រព័ន្ធផ្សព្វផ្សាយ CNA ថា ការវាយប្រហារដោយកាំភ្លើងកាលពីថ្ងៃអង្គារ ឆ្លុះបញ្ចាំងពីនិន្នាការដ៏គួរឲ្យបារម្ភអំពីការប្រព្រឹត្តបទឧក្រិដ្ឋរបស់យុវជន នៅក្នុងប្រទេសថៃ។

យោងតាមទិន្នន័យពីនាយកដ្ឋានសង្កេត និងការពារអនីតិជន បានបង្ហាញថា ចន្លោះពីខែតុលា ឆ្នាំ២០២០ ដល់ខែកញ្ញា ឆ្នាំ២០២១ មានបទល្មើសចំនួន ១.៤៧៧ករណី ដែលត្រូវបានប្រព្រឹត្តដោយមនុស្សអាយុក្រោម ១៨ឆ្នាំ លើអាយុជីវិត និងរាងកាយ។ ចំនួននេះបានកើនឡើងដល់ ១,៦៩៥ករណី ក្នុងអំឡុងពេលដូចគ្នាក្នុងឆ្នាំបន្ទាប់៕