កំពង់ឆ្នាំង៖ ប្រជាកសិករខេត្តកំពង់ឆ្នាំងក្នុងឆ្នាំ២០២៣នេះ ធ្វើស្រែវស្សាបានលើសផែនការ ខណៈ​ស្រូវវស្សាកំពុងដុះលូតលាស់ល្អប្រសើរ និងមិនមាន​ការរង​ផល​ប៉ះពាល់​ដោយ​សារ​ជំនន់​ទឹក​ភ្លៀង​នោះ​ឡើយ ។ នេះបើតាមការបញ្ជាក់អោយដឹង ពីលោក ងិន ហ៊ុន ប្រធានមន្ទីរកសិកម្ម រុក្ខា​ប្រម៉ាញ់ ​និងនេសាទខេត្តកំពង់ឆ្នាំង នាថ្ងៃទី០៦ ខែតុលា ឆ្នាំ២០២៣នេះ ។

លោក ងិន ហ៊ុន បានថ្លែងឲ្យដឹងទៀតថា៖ នៅឆ្នាំ២០២៣នេះ ខេត្តកំពង់ឆ្នាំង​មាន​ផែនការ​ធ្វើ​ស្រែ​វស្សា​នៅ​លើផ្ទៃដី​សរុបចំនួន១៤០ ៦០០ហិកតា ។ ប៉ុន្តែរហូតមកដល់ថ្ងៃនេះ ប្រជា​កសិករ​សម្រេច​ធ្វើ​ការដាំដុះស្រូវវស្សាបានលើសផែនការ គឺធ្វើបានលើផ្ទៃដីសរុបកើនដល់ ១២២ ០០០​ហិកតា​។ ក្នុងចំណោមស្រូវវស្សាទាំងនោះ ស្រូវស្រាលមានចំនួន ២៩ ៤៥០ហិកតា ស្រូវ​កណ្តាល​មាន​ចំនួន ៦៥ ៦៤៤ហិកតា និងស្រូវធ្ងន់ធ្វើបានចំនួន ៤៥ ៥០៦ ហិកតា កើនលើស​ឆ្នាំ​២០២២​ចំនួន​៤០ហិកតា ។ ដោយសារមានទឹកភ្លៀងគ្រប់គ្រាន់ ស្រូវវស្សាឆ្នាំនេះ កំពុងដុះ​លូត​លាស់​ល្អប្រសើរ ក្នុងនោះ រយះពេលប៉ុន្មានថ្ងៃនេះភ្លៀងបានបន្តធ្លាក់ចុះនៅតាមតំបន់ភ្នំ ប៉ុន្តែ​ស្រែ​វស្សា​របស់​បងប្អូនប្រជាកសិករ មិនទាន់រងផលប៉ះពាល់ដោយសារជំនន់ទឹកភ្លៀងនៅឡើយទេ ខណៈ​ខេត្ត​នៅក្បែរខាងកំពុងរងគ្រោះដោយជំនន់ទឹកភ្លៀងនោះ។

លោក ងិន ហ៊ុន ប្រធានមន្ទីរកសិកម្មរុក្ខាប្រម៉ាញ់ និងនេសាទខេត្តកំពង់ឆ្នាំង បានបន្តថា ក្រៅ​ពី​ដាំ​ដុះ​ស្រូវវស្សាហើយ ប្រជាកសិករបានខិតខំដាំដុះដំណាំរួមផ្សំផ្សេងៗទៀតផងដែរ និង​ចិញ្ចឹម​សត្វ​បន្ថែម​ ដើម្បីបង្កើនផ្គត់ផ្គង់ជីវភាពក្នុងគ្រួសារអោយធូរធារថែមមួយកម្រឹតទៀត ៕ កាំង ហុងវាស្នា