ប្រធានាធិបតីរុស្ស៊ី លោក វ្ល៉ាឌីមៀ ពូទីន កាលពីថ្ងៃព្រហស្បតិ៍ (៥ តុលា) បាននិយាយថា ការ​ធ្លាក់​យន្តហោះដែលបានសម្លាប់មេដឹកនាំក្រុមទាហានស៊ីឈ្នួល Wagner លោក Yevgeny Prigozhin កាលពីខែសីហា គឺបណ្តាលមកពីការបំផ្ទុះគ្រាប់បែកដៃនៅខាងក្នុងយន្តហោះ មិន​មែន​ដោយ​ការវាយប្រហារដោយមីស៊ីលនោះទេ។

យន្តហោះឯកជនឈ្មោះ Embraer ដែលលោក Prigozhin បានជិះធ្វើដំណើរទៅកាន់ទីក្រុង St. Petersburg របស់ប្រទេសរុស្ស៊ី បានធ្លាក់នៅភាគខាងជើងនៃទីក្រុងមូស្គូ ដោយ​បាន​សម្លាប់​មនុស្ស​ទាំង​១០នាក់ នៅលើយន្តហោះនោះកាលពីថ្ងៃទី ២៣ ខែសីហា រួមទាំង​ឥស្សរជន​ជាន់​ខ្ពស់​របស់​ក្រុមទាហាន Wagner ពីររូបផ្សេងទៀត អង្គរក្សបួននាក់របស់លោក Prigozhin និង​សមាជិក​បើក​យន្តហោះ៣នាក់។

លោក ពូទីន បានលើកឡើងថា យន្តហោះនេះត្រូវបានបំផ្ទុះចេញពីខាងក្នុង ដោយនិយាយថា ប្រធានគណៈកម្មាធិការស៊ើបអង្កេតរបស់រុស្ស៊ី បានរាយការណ៍ប្រាប់លោកកាលពីប៉ុន្មានថ្ងៃមុន។

លោក ពូទីន មិនបានផ្តល់ព័ត៌មានលម្អិតបន្ថែមអំពីមធ្យោបាយដែលគ្រាប់បែកដៃមួយគ្រាប់ ឬ​គ្រាប់​បែកដៃច្រើនគ្រាប់ អាចត្រូវបានគេបំផ្ទុះនៅលើយន្តហោះនោះទេ ប៉ុន្តែបាននិយាយថា ក្រុម​អ្នក​ស៊ើបអង្កេតបានធ្វើខុស ដែលមិនបានធ្វើតេស្ដជាតិអាល់កុល និងសារធាតុញៀន លើ​សាកសព​អ្នកដែលបានស្លាប់ក្នុងឧបទ្ទវហេតុ ព្រោះលោកពូទីន គិតថា លោក Prigozhin បាន​ប្រើ​ប្រាស់គ្រឿងញៀនក្នុងអំឡុងពេលការផ្ទុះកើតឡើង ខណៈ​ដែល​គ្រឿងញៀន​កូកាអ៊ីន​មួយ​ចំនួន ត្រូវបានគេរកឃើញនៅការិយាល័យរបស់ក្រុមទាហានស៊ីឈ្នួល Wagner ក្នុងទីក្រុង St. Petersburg កាលពីមុន។

ការបះបោររបស់លោក Prigozhin បានបង្ក​បញ្ហា​ប្រឈម​ដ៏​ធំបំផុត​ចំពោះ​ការ​គ្រប់គ្រង​របស់​លោក​ពូទីន ចាប់តាំងពីអតីតចារកម្ម KGB រូបនេះ ឡើងកាន់អំណាចក្នុងឆ្នាំ១៩៩៩មក។ ក្រុម​អ្នក​ការ​ទូត​លោក​ខាងលិចបាននិយាយថា បញ្ហានេះបានបង្ហាញពីភាពតានតឹងលើប្រទេសរុស្ស៊ីនៃ «ប្រតិបត្តិការយោធាពិសេស» របស់ខ្លួននៅក្នុងអ៊ុយក្រែន៕