ភ្នំពេញ៖ ឯកឧត្តម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានទទួល​ជួប​សំណេះ​សំណាល​ជាមួយ​ឯកឧត្តម W.Patrick Murphy ឯកអគ្គរដ្ឋទូត នៃសហរដ្ឋអាមេរិក​ប្រចាំ​ព្រះរាជាណា​ចក្រកម្ពុជា និងសហការី នារសៀល ថ្ងៃទី៥ ខែតុលា ឆ្នាំ២០២៣។ ជំនួបនេះ គឺ​ថ្នាក់ដឹកនាំទាំងពីរ ជជែកពិភាក្សាពីវិស័យមុខងារសាធារណៈនិង យន្តការជ្រើសរើសមន្រ្តី។

ឯកឧត្តម ហ៊ុន ម៉ានី រដ្ឋមន្រ្តីក្រសួងមុខងារសាធារណៈ និង ឯកឧត្តម W.Patrick Murphy ឯក​អគ្គ​រដ្ឋទូត នៃសហរដ្ឋអាមេរិកប្រចាំកម្ពុជា បានធ្វើការ​ពិភាក្សា​ជុំវិញ​ប្រធាន​បទ​ពាក់ព័ន្ធ​នឹង​វិស័យ​មុខងារ​សាធារណៈ កិច្ចការងារកំណែទម្រង់រដ្ឋបាលសាធារណៈ និងប្រធានបទផ្សេងរួមមាន យន្តការ​នៃ​ការប្រឡងជ្រើសរើសមន្ត្រី ដែលបានអនុវត្តក្នុងប្រទេសទាំងពីរ។ 

ឯកឧត្តមឯកអគ្គរដ្ឋទូត និងសហការី បានចែករំលែកលើស្ថានភាព និងដំណើរការ នៃ​ការ​ជ្រើសរើស​មន្ត្រី​រាជការនៅសហរដ្ឋអាមេរិក ដោយបានលើក​ឡើង​ពី​ការ​លំបាក​នៃ​ការ​ផ្សព្វ​ផ្សាយ​ព័ត៌មាន ដើម្បីទាក់ទាញអ្នកដែលមានសមត្ថភាព ចម្រុះជាតិសាសន៍ ពីបណ្តារដ្ឋនានា ជា​ពិសេស​រដ្ឋ​ដាច់​ស្រយាល ឱ្យមកចូលរួមប្រឡងមន្ត្រីដោយផ្អែកលើគោលការណ៍ស្មើភាព និងមាន​សមត្ថភាព​។

ក្នុងជំនួបនេះ ឯកឧត្តមរដ្ឋមន្ត្រី ហ៊ុន ម៉ានី បានកត់​សម្គាល់​រាល់​ចំណុច​ដែល​ឯកអគ្គ​រដ្ឋ​ទូត​បាន​លើក​ឡើង និងបានគូសបញ្ជាក់ពីបេសកកម្មរបស់ក្រសួងមុខងារសាធារណៈ ជាពិសេស​លើ​ការ​អនុវត្ត​ចក្ខុវិស័យ និងវិធានអាទិភាពរបស់រាជរដ្ឋាភិបាល ក្រោមការដឹកនាំ​របស់​សម្តេច​មហា​បវរ​ធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា លើកិច្ច​ការ​រៀប​ចំ​យន្ត​ការ​ថ្នាក់​ជាតិ​ប្រឡង​ជ្រើសរើសមន្ត្រីរាជការ។ ជាមួយគ្នានេះ ឯកឧត្តមរដ្ឋមន្ត្រី​ក៏​បាន​លើក​ឡើង​អំ​ពី​សកម្មភាព​ការងារដែលកំពុងដំណើរការ ខណៈការងារមួយចំនួនទាមទារពេលវេលាក្នុងការអនុវត្ត ហើយ​នឹងការបន្តខិតខំប្រឹងប្រែងសម្រួចបន្ថែមក្នុងការអនុវត្តឱ្យកាន់តែប្រសើរ។

សូមជម្រាបជូនថា តាមរយៈជំនួបនាពេលនេះដែរ បានអនុញ្ញាតឱ្យថ្នាក់ដឹកនាំទាំងពីរ អាច​ផ្លាស់​ប្តូរ​មតិ​យោបល់ និងបទពិសោធន៍ត្រង់ទៅត្រង់មក រៀនសូត្រពីគ្នាទៅវិញទៅមក និងស្វែង​យល់​ពី​កត្តា​ប្រឈម​ផ្សេងៗ នៃប្រទេសទាំងពីរផងដែរ៕ អត្ថបទ៖ គឹម ហុក